Katarina Uupindis
ǁNāpan ge hûdisis (70) xa a !nâsa khoena !hūb a ǂhabase !khōsis !nâ ai!â ge ǂoa wekheb ai, !khōsis !nâ ge ūhe, Covid-19 !aroma ge ǂgâxa-ūhe ǂhanusi !nau-ams ǁgaraga !ûǂams !aroma.
Nē !nau-ams hîa tsoatsoas !nâ aibe Erongob tsî ǀKhomas ǀkharikha ai ǀgui ge sîsenxa is ge, ai!â gere ǂoa wekheb, ǂguro !nau-ams !gûǀams dib ǀkha, !hūb a ǂhabase 4 !Khaitsâb dis kōse nî !khoese ge mîǁguihe.
ǁNān hîa ge !khōsis !nâ ūhena xun ge disihakaǀana (14) mîsa !gôab xa !nāsase ǀgui !khaib ai hâs ǀkha !gaeǁaresa ūhâ tsî haka khoen ge mā-ams ose, permits ǀkhaise gere !narima. ǀAwa!nam ra !nuris !oagun ge hakadisi (40) khoena mā-ams ose ǂauxûiba ǁamaxūs ǀkha !gaeǁaresa ūhâ tsî !nanin (6) ge ǂhâǂhâsa xūn !âb !nâ ǁnā tama ǂharugugu ǀkha ai!gûs ǀkha ǀhapixa kaisen hâ. ǁKhātin ge disikoroǀa (15) khoen tsîna !kharaga !ûǂamdi ǀkha !khōsis !nâ ge ūhe. ǀAwa!namn danab, Sebastian Ndeitungab ge ai!â gere ǂoa Mantaxs ai ge mî, ǁîn di ǂhanusi !oabade dīǂuis dâu!khūdi xa, !gōsase ǀawas ǀkharigu !nâ ǁgoaǂuis ase ībahesa, hoa !khain ain a sī ǁoas ǀkha.
Zambezi ǀkharib !nân ge ǀawa!namna ǂgaude ra sîsenū !garo!ā !âgu hîa dâu!khūdi xa a sīhe ǁoagu tawa sīs !aroma. Ai!âb ǁîba ra mî !gomsib ge haiǀgoms tsî kai haidi hîa ǁnāǁgoe tsî !kharusa ra īǁoa kaidi xas supuse !kharaga !âgu !nâ kō!gâs !aroma sīsa supuba tamasa ǂhanusi mâisana.
ǁKhāti i ge Ndeitungab ra mîsa !oa, Ohangwenab tsî Omusatib hâkha hîa kaise tsaura tsî ǂgoaxa !hūba ūhâkha !nâ ǁnā !nū kilometerga !hūǀgorade xu ǀkharisi ǀgoradi ǁga !narisa supu tama hâ.
“Nē mâsib ge ǁkhāti ǀnîn xa ra !ē!khō-ūhe tsî mā-ams ose Namibiab tsî Angolab hâkha !nâ ra ǂgâ kâ ǂoahe”, tib ge ǀawa!namn danaba ge mî. ǁGoaǂuidi ǀguis hîa ǁkhāti kai tsûadanab ase hâs ge, kaise ǂgui !gôab khoen hîa nē !âba xu nau !âb ǁga tamas ka i o ǀkhariba xu ǀkharib ǁga ra īn diba, !gōsase Kaiǁkhaes tsî Otjiwarongos ǁkhae-ams tawa. “ǀAsase ge unu!nâhe ǁgaragu di ǀguib hîa ra mā-am, 3%gu xa a ǀoro ǂauxûiba ūhâ !kharib a ǁamaxuhe ǁkhās dib ge !ēsa ge ǂgâxa-ū tsîn gen au ǂkhāsa xûin tsîna ra ǁamaxhe,” tib ge Ndeitungaba ge mî.
!Nau-ams ǁgaraga ǁnâuǀnams ge a hoa !hūǁîn di !ereamxasi.