Konyara vantu wokusika ko 800 komavango aga vana tura gokutunga moOshakati ngesi tavakagwana rutjeno vana kuvatulirapo mawokowoko momambo gawo.
Eyi kuna kara nye meruganeno kumwe pokatji kondango zaOshakati ntani mbunga zokugava rutjeno vana kutumbura asi Oshakati Premier (OPE).
Nombunga edi mbali kuna kara asi dahepa kugava rutjeno komambo gokusika ko 770 kevango lyountambali ntani lyountantatu moOnawa evango lyokutunga elikwamo lyangesi kuna kupura nye yimaliwa yokusika ko N$21 nomiliyuna.
Projeka zangesi kwazitura moyirugana ministera gonodoropa nekuliko nomukunda doponze Erastus Uutoni, moutano kaupwire. ‘’ Ame kuna kupandura OPE ntani OTC kwayivazuvha mukaro gwangesi.
Ngepangero, ose kuna hara asi vantu ndi nokampani dononzi dirugane yininke yokufana ngesi, morwa awo ngesi kuna kumoneka asi kuna kureta nye mauwa pepi novantu vetu.
Yimo ana kutanta. Uutoni katente asi mokutura nye eyi moyirugana ntani siruwo sayo, nayininkisa vantu vakare nye unene varongwa vahare kuyakara komavango gangesi.
Posilika sooso, OPE mukarelipo gwawo, Nelson Sheya kafatwilire asi rutjeno oru vana kukavatulira ngesi, kuna hamenemo eyi avatumbura asi pre-paid meters, omu muna hamene noramba noyimbangu oyo yimwe vana kukagava kovantu ava. ‘’ Vantu ava vcana kugwanenamo mauwa melikwamo lyangesio simpe tavakagwana mauwa gana kara melikwamo lyorutjeno omu vana kukagwana nsonso zongwa kuhorako morwa awo kuna kara wokugwana yiwizamo yoyisesu, yimo ana kutanta mukurona pamberewa zaOshakati.
Koruha rwendi mukurona godoropa zaOshakati Leonard Hango, katente asi awo ngondango kuna kara nelikwamo lyokuvatera ava vana kukatunga pomavango gomape modoropa, elikwamo eli naliza ure wonomvhura ntano.
Dogoro ngesi hawe awo yavagenda nawa mokutulisapo mavngo gomape gokutunga moOshakati ; Evululuko, ngesi kuna kara asi Oshakati ruha 10, ntani 11; rukanda rwaPohamba, runa kara 13, ruha rumwe rwaOkandjengedi kombindakano, runa divikwa asi Oshakati 15; Ompumbu Proper ntani ruha rokuhova rwaUupindi kombiindakano,’’ yimo ana kutanta Hango.
Kugusako nye kutura elikwamo lyorutjeno paveta, Uutoni simpe kakatulire elikwamo lyokudika evango lyokudimisa mundiro paveta validike ngesi.
Evango eli nalipura yimaliwa yokusika ko N$6.7 nomiliyuna ntani evango lyokuzugumina yihando poOthingo, eli lina kara asi talikapura yimaliwa yokusika ko N$6.5 nomiliyuna. vkaapanda@nepc.comna