ǂNŪǂGOAES – Ministeris Kai!ā tsî !Garo!āǀkharigu Omkhâisens dis ge ǂhanub di ǂGui ǀNōb !nâ hâ Omna mās Proxrammi !nâ-ū, ǂoa ge wekheb Wunstaxs ai, 89 omde ǁnā !gâi!gâ khoen Kronlein ǁanǁguib ǂNūǂgoaes dib !nâ ǁgoeb dina ge ǁkhaeǁnâ.
ǁNāpab nē ǁkhaeǁnâs ǁaxasib tawa, dana gowaǀîsa gere mā soab aib ge !nakǂnôa ministeri, Derek Klazena ge mî, nētsē a mûsa ǁgauǁgaus hîa !gâiaǂgaoba go hā-ūs ǀgaisa sîsenǁareba xu ge !huisa tsî ǁnā-amaga ǁîb tsîna ǁnān hîa nēti ī ǁkhowa-amga nî !khō!oan ǀkha ra dâǀhaosa. “Nēs ge ǁgauǁgaus, ǂhanub ra ǁîb mîmaidi tsî !ereamxasigu ai mâǀoasa, ǁnāpab ra ǂhâbasa marisa ǂgā in khoena sī!nâ ǁkhān a ǂganǀgauba ūhâ omna hōbasen ǁkhāse,” tib ge gere ǀgomǀgom!gao.
Nē ǂgiǂgomâisab ge ai!â gere ǁgui!ās ge, ǂgui ǀnō hâ omna mās di proxrammi di !huis ge a tsoatsoa-ūbahe !aromas, ǀnai hâ ommās !aroma ra dītsâhe proxramga ǂkhâ!nâ, xawe ǂâisa ǁnān hîa kaise ǂamse ra !khō!oa tsî ǀgapi ǂganǀgauga a sī!nâ ǁoan ai ūhâse.
ǁKhātib ge Klazena ge mî, ǂhanub di ǁguiǂgāsens ǁanǂgāsabenna !gao!gao ǂhâsigu !nâ huis tsî sî!nâ ǁkhān a omna mās ǁnowe!nâhe ǁoasa tsî noxopa nî ai!gûsa nēsi hâ ǂgaeǂguis !Hūb di ǁÛb Hage Geingob dis !naka.
Klazeni ge ge ǂan!gâ, ǁgoaǂuidi hâsa nē proxramma ǂkhanuse !gûǁnâ kais !nâ, xawe hâ a ǁgauǁgaudi !oagu ǀgupa mâǀhaos tsî ǁguiǂgāsens khoena xu hâra, ǀgui xū-i tsîn xa a kai ǁoa tsî ǁnā-amaga oresa hōbas īǁoasasiba ra ǀariǂuisa.
“ǂGanǀgaub omn diba sī!nâs, !gōsase ǂam hōǂgā-aon !aromasa ǁapoǁapos aseb ge ǂhanuba, Kabinets ge ū mîǁguib !nâ-ū, nē omdi ǂganǀgauba 75% kōses tsîna ge ǁgôaxa-ū,” tib ge ge mî. ǁNā 89 ǀasa omǀhonkhoenab gere gowaǀî soab aib ge Klazena ǁîna ge mîba, National Housing Enterprise tsî ǂNūǂgoaes !ā!khōmais hâra ge a ǁgui-aihesa, nē hoaraga omdi nî 31 ǂNūǁnâiseb 2020 ai doeǂgâ!nâhetoasa.
Noxopab ge ǀasa omǀhonkhoena a mîbas ge, in ǁîn di mîǁguib ǁkhâkorobe mātare-oas maridi disa tā ǁnā!gâ, ǁîna nēsa dīǀoas !nâ-ū ǀgui-i ge sao rase !âumâ khoe-i tsîna ǁî-i !ēsa a hō ǁkhā. Silly Wimmerths, îs tsîn nē 89 khoen di ǀguis ge gere mî, kaises ra gangansa !khai-i hîas ‘ti oms’ ti a ǂgaiǁkhā-e ūhâs !aroma ti.