Xoa-aos: Albertina Nakales
׀AEǁGAMS – ǁAupexan ge ׀gui miljuns khoen ׀guina xoamâisens !aroma ge māsa i ǁaeb di ׀unitsēs ai ge xoamâisen hâ i. ǁHûidi !Khōdana !Nans ge ge mî, ǁîn hoana ge dītoasa !hūb a ╪habasen hoa !gôakhâiga nî dītoa tsî ╪hanu !gôaba hōsa.
ǁHûi-aon di xoamâisendi ge Namibiab a ╪habase 15 !Khanni 2014 dis ai tsoatsoa tsî 2 ׀Khūǁkhâb 2014 dis ai ge ׀am. Nē xoamâisendi ge !Haosi ╪Nûs tsî Presidenti ǁHûidi !aroma gere dīhe. Nē ǁhûidi ge ׀aweǁguiga !oa nē kurib di ׀Hō╪gaeb !nâ nî hâ. Electoral Commission of Namibias (ECN) ge xoamâisendi ge tsoatsoasa xu wekhekorope ǁnā ǁaeb kōse ge sī!nâhe xoamâisens !gôaga gere mā!kharu tsî ǁan╪gāsabena ╪an╪an.
“Nausan ge !nubusin tsî ╪hani gere xūna xoamâisendi tsoatsoas !nâ hâ i, xawe da ge ge dītsâ ǁîna oresa hōbasa tsîs ge hoa xoamâisensa ╪khanuse ge !gûǁnâ Sontaxtsēs ais ge hā a ׀ams kōse. Hoa sîsengu ge a !gû׀am ׀gaus ׀kha da ge kaise a ╪khî╪âixa. !Auga!hūsi ╪nûǁkhaebade xus tsîna da ge !gôaga ge !khō!oa,” tib ge Theo Mujorob hîa ge ǁnā ǁaeb ai ╪nûǁkhaeba ra direkterse ╪nôa iba ge mî. Xoamâisendi nî !gû׀ams ai!â ge ╪nôa i Wunstaxtsēs ain ge 977 164 khoena ge xoamâisen hâ i. Nē !gôab ge !hūb !nâ hâ ǁan╪gāsabena 974 545 tsî !auga!hūgu !nâ hâna xu 2 619 ti ge !khō╪gā hâ i. ׀Khomas ׀Kharib xō׀khān ge noxopa ╪gui khoena sao ra ׀kharigu !nâ ge xoamâisen:
Omusati ׀Kharib, Ohangwena ׀Kharib, Oshikoto ׀Kharib, Oshana ׀Kharib, Erongo ׀Kharib tsî Kavango Ai╪oas tsî Huri╪oas hâga. Mujorob ge ge mî, ǁîn a ׀hawesa xoamâisendi !aroma gere hoa ׀kharigu !nâ sîsenūhe xūn hoana dana beros ǁga oa׀khī-ūs ׀kha. ǁKhātin ge a ׀hawe ôa!nâdi ׀kha ׀nî khoen ׀guis xa !nāsa !nāde xoamâisen tamasa. Ai!â ge !khō!oahe ǁawoǁawosa tama !gôagu hîa 2 619 khoen Namibiab !auga hân digu ge 29 !kharaga !hūga xu ge !khō!oahe. Nē 29 !hūga xub ge Suid Afrikaba ǁîb hoagu xa a ׀gapi !gôab 1 329diba ge !khō╪gā hâ i. Zimbabweb, Russiab, Malaysiab tsî Chinab hâgu ge ׀nî !hūgu hîa 120 xa !nāsa !gôab xoamâisen hâ ǁhûi-aona ūhâga.
ECNs ge ge mî, ǁnā khoen hîa ge nēsi xoamâisen tama a īn, nî ׀Hō╪gaeb ǁhûidi ai!â hā׀arosen ra xoamâisens ǁaeb hîa !goaxa ǁaeb !nâ nî noxopa ╪an╪anhese īb !nâ xoamâisens di !ēsa hōsa.