I Kuvee Kangueehi
OTJOMUISE
Oritja-vari omupangure wo Tjombanguriro tjOkombanda Collins Parker wa turukire oumune we motjiposa ozorata o murongo naimwe zOvambanderu mu va ningirire okuyarurwa mo vihavero vyao ku va herurwa iyo Ouhonapare wOmbazu wOmbanderu ombura ndjazuko.
Tjazire no ku puratena ko ma tuapero wa Andrew Corbett ohahende yo ozorata omurongo na imwe inda na Harold Geier wo Uhonapare wOmbanderu, Parker wa turikire oumune we o ure mbu hina kutjiukwa na reparisa oumune wo Tjombanguriro ihi wombura ndjazuko. Geier watjere eningira ro vaningire riri mozondi mbari. Rutenga omo kutja va henununwa mo vihavero vyao poo va isamewa no ku ngunda ama veherurwa kuvyo iyo Ouhonapare wOmbazu. Watjere o u zeu oku yarura Erastus Kahuure mo tjito tjOuhona wOvahona mena ro kutja mOmbanderu kamuna otjito ihi. Watjere kanawa Kahuure okuritja Otjiuru tjOvahona orondu na ndarire kutja wa urikwa nao eye kena pa tuirisiwa motjito ihi. Ngunda ehina wa tuirisiwa eye wauta oku riisana Otjiuru Tjovahona nu kena pa kara nousemba kaani wo Tjiuru Tjovahona. “Oveta yOuhonapare wOmbazu wina kaina pu iyandjera otjito tjo Tjiuru Tjovahona mena rokutja Nguvauva onguri Ombara.”
Komurungu Geier wa tokere ovaningire okuraisa omatjangwa wo tjirata tjo muhoko tji makuzu tjazika Kahuure otjo Tjiuru Tjovahona. Watjere eningira oritjavari okunakaura oveta yOvambanderu. Wa patanene kutja eye nguma kuramenepo wa penga omirari oveta indji mo ku memwea muyaso kutja ya wondja natja Ombara Munjuku Nguvauva wa u ngurisa o u semba we otjo Mbara Otjitambi okuyeta otjihungiriro tjoveta indji komayandero tjinga tjahinga ozombura nderi kombanda yo murongo. Watjere okuyeta otjihungiriro ihi komayandero tjinga tja repara kapendje no u rizemburuka ouwa nu wina ka ku ninikiza okutara kongaro ndjaripo.
Nandarire kutja Geier wa itaverere kutja oveta indji kanaa yatua rewa iyo tuhindo ko u tukondua otja tji pari pa tiewa, ihi aa tji reka reka ko tjimariva.
Watjere omu kuramenwapo we wa kamuna kutja marire ombiriha oku ihinda nu ihi tja tjitua okuyandjera kutja ihandjauke no kuhungirirwa. Wina wa pa tanene kutja okarupa okatiti uriri kOvambanderu oku kayakura oveta indji natja ozorata azehe zo kombanda opuzari pendje no za Mongua nda kuramenwa po iyorata onene. “Pendje nozorata ozonene Otjiuru Tjerapi O Field Marshall no wo kehi ye wina opari nawina Otjiuru tjo Vapangure, Peter Nguvauva.”
Geier watjere nandarire kutja ozondiero ka naa zatoorwa no maraka tjimuna mouyara wa nambano, omirari mbya kongorerwa pozondondo peke peke vyari mo muhunga wo mbazu novitjitua nongaro yomuhoko wOmbanderu.
Okupata Geier watjere Nguvauva wa ungurisa omasa we otjo Mbara ndja zemburukwa iyOhoromende ya Namibia no muhoko wina wOmbanderu.
Corbett wa patanisire nomasa oumune wa Geier natja Nguvauva kena o u semba okutjayerera otjiungura tjo ma memeno woveta mo ndjira poo okuramba ozorata zombazu.
Watjere o u samba imbwi una otjiru tjehi tjima wo kuzika zo ministera, okwiisira vo mo vyo kamburwa poo okuhanga ovita. Watjere Nguvauva otjombara kena omasa inga mena rokutja Oveta yOuhonapare wOmbazu iraisa nawa kutja ovitjitua avihe vyasere okurira mondero yo tjiwana no vo vanane vombazu vena omerizirira ko ministeri yo vitjitua imbi.