MWANAMUSIZANA wa lilimo ze lishumi kaze nee (14) za kupepwa na kile a banduka lifu kasamulaho wa kutakalalwa ki kwena mwanuka ya Kavango, mwamazazi a cwale a felile.
Kwena ne musile inge a holofezi ahulu luli. Mwanako ya cwale, musizana u zamaya ka kucun`uta ni sifateho se sili mwasililo ka nako kamukana kalibaka la butuku bwa likolofalo zeli fa mubili wa hae.
“Nina ni litohonolo kuli la bukacenu le na buyela. Ni utwa butuku luli kono na itumela feela kuli na pila,” mwanana hana shobota inge ali fa mumbeta wa hae mwasipatela sa Nkurenkuru mwasikiliti sa Kavango.
Mwanamusizana wa libizo la Esther Ndara nanza a tapisa litino za hae mwanuka muta simpangaliko kaufeela se si ezahala. Kwena ne kile ya mushalela fa silupi.
Musizana u hupula kubona mali inge a suluha fa silupi sa hae sa silyo muta kwena I mano mutakalala.
“Nenze ni sweli kutapila litino zaka mwanuka ni balikani baka ba kwasikolo hane lu yo zwelela kwabondingi kono ka bumai mwanako yene ni inzi mwamezi neni kile na utwa feela butuku kwaliutu laka la silyo ni kubona mali mwamezi kaufeela. Ne ni kile na huwa tuso ni kutalimela kwena mwameeto a yona,” Ndara hana lu taluseza sene si kile sa ezahala ka lizazi lani, lana sa hupula feela ka lifu.
Na ekelize kuli: “nese ni hupula feela kuli nita shwa mwanako yene ni lwanela bupilo bwa ka.”
Mwanako ye kuswani feela kwena ne kile ya maata mi litohonolo la mwamusizana neli kilwe la bonwa kakuli na kile a mata mwamezi inge a pila.
Mwanako yana swelwi, balikani ba hae kaufeela neba kile ba mata mwamezi basa hupuli kaza tuso yena inge a tundane a nosi.
“Neni matezi feela kwahae. Neni luzize mali a man`ata luli,” ne kubulezi musizana Ndara yali mwanasikolo fa sikolo sa Kahenge Combined. Musizana nanza lila mwanako ya kuikopanya niba mutende o, ili sisupo sa kuli na kutwa butuku luli.
Mwanako nyana yana izo esha mwahae ne kusina mutu mi tuso ne kile ya fiwa feela kuyena ki batu ba bapila mabapa bene ba boni likolofalo za hae ni maemo a nali kuona mwanako yani.
Na kilwe a a nkufisezwa kwasipatela sa Nkurenkuru, libima ze ketalizoho kuzwa munzi wa habo.
Mwabiki I lin`wi yene felile pili Ndara a sika swaliwa kale, lyaminzi yo mun`wi na kilwe a swaliwa ki kwena mwamezi a swana. Yena ka bumai ha sika fumanwa kale ni la bukacenu le.
Mapokola fasa patehile ni kutalima situpu sa hae.
Kuswaliwa kwabayahi ka libaka la likwena kupahami hahulu mwanako ya cwale mwasikiliti sa Kavango baken`I sa mezi a nuka a pahami hahulu kalibaka la munda tuna o apesize sikiliti sani. Likwena linze li sweli kuswala batu ni likomu hamohocwalo ni limunamu zen`wi.