ONDOBE
Omupresidende Hifikepunye Pohamba okwa li a gunu aanongeki mboka haya gandja omategelelo kaanasikola oshowo mboka ye na oondingosho dhi li popepi noosikola opo ya hulithe po omukalo nguka moompadhi oontalala.
Omupresidende ota ti aalongisikola mbaka otaya yonagula omaihumbatonawa gaanasikola peha lyo ku ya ndungika ngaashi sha halika kepangelo oshowo kaavali yawo.
Momakela aanasikola, aalongi mbaka ohaya dhike nokutunga oombashu noondunda dhiikolitha popepi nomanongelo mpoka haya longo, onkee pamukalo nguka oya tula aanasikola momamakelo gomaludhi ogendji oshowo elongithonayi. Omupresidende dhika okwe dhi popi pethimbo ta egulula Osekundosikola Mwadikange Kaulinge ndjoka ya tungwa nokapandi koodola oomiliyuna 44. Mwene gwoshilongo ti indile aaleli yopamuthigululwakalo oshowo ookansela yopaitopolwa opo ya shilipaleke kutya omikalo dholudhi nduka odha thelwa okalambo moompadhi oontalala.
“Ngele ope na natango mboka yi ipyakidhila nokutunga uundingosho popepi noosikola, naya kuthe po iinima yawo nokuya,” osho a ti peegululo lyosekundosikola ndjoka mEtitano.
Eegululo lyosikola ndjoka olya ningwa moshikandjohogololo she Ondobe, shoka shi li mewiliko lyomonamati, Kansela Mandume Pohamba, noshituthi shoka osha egululwa negalikano kOmumbisofi gwaElcin koRundu, Johannes Sindano.
Omupresidende okwa kundaneke engathithi lya kwatela mo Ominista yElongo, Nangolo Mbumba, Ngavena gwaHangwena, Usko Nghaamwa, Omukuluntuwiliki gwElongo mOhangwena, Josia Udjombala, aaleli yopambepo nopamuthigululwakalo kutya omishangwahokololo omiwinayi odha thika mombelewa kutya aanasikola moosikola otaya pewa omategelelo kaakuluntu mboka haya longitha nayi onkalo yoluhepo nuuhasha waagundjuka-kadhona.
“Onkalo ndjika itayi vulu nando okupitikwa yi tsikile….okuya momilalo nuukadhona wepupi eshona oshi li ekaulonyanga hali geelwa paveta,” Omupresidende ta ti. Aakaulinyanga, omutse gwoshilongo tagu ti, naya kwatwe nokupangulwa pwaa na ohenda. Aanasikola mboka ye li monkalo yoshiponga shiilonga yopaihulo oya pumbwa okugamenwa kaa ya kwatwe komikithi dhohoni, mwa kwatelwa oHIV/AIDS, Pohamba ta ti. Oshikwawo omategelelo inaga longekidhwa ohaga etitha okuza kwaagundjuka mosikola nokukwatwa kombuto nomukithi goHIV/AIDS. “Aalongisikola oyi inekelelwa okundungika aanasikola noku ya gamena kiilonga iiwinayi.
Ihe peha lyokuninga ngeyi, aalongisikola ohayi iningi omambungu taya yonagula po aanasikola yawo yene. Oshisithahoni oshi thike peni.
Aalongisikola seni ohoni mboka hamu ningi ngeyi,” Pohama ta ti. Ota ti aanona oyo oshigwana shokomongula, onkee oya pumbwa okuputudhwa nokutekulwa opo ya vule oku ka ninga aantu aapondoli yomonakuyiwa. Shika otashi vulika moku ya pa elongo ndyoka tali opalele opo ya ka vule oku ka tsakaneka omashongo go-pethimbo ndika oshowo oompumbwe dhomonakuyiwa. Omupresidende ota ti esindano lyepangelo okugandja iiyakulitho ya pumbiwa oshowo oompito dhelongo oli ikwatelela unene nkene aakwashigwana taya kwata nawa nokulongitha iiyakulitho mbika.
Shika osha simana molwaashoka okugandja elongo lyongushu inashi ikwatelela ashike ketungo lyoongulu dhosikola, oolaboratoli noongulumambo, ihe otashi pula wo oompumbwe dhaalongisikola dhi kale dha ungaungwa nadho nawa. Molwetompelo ndika, Omupresidende oti indile Uuministeli wElongo wu ninge etokolo okutunga omagumbo gaalongisikola kehe mpoka tapu tungwa osikola ompe. Shika otashi ka kala eyokomeho ewanawa nomauwanawa kaanongeki, unene mboka haya ningi omaindilo guulongi miitopolwa yokomikunda nkoka omalukalwa ga pumba noonkondo.
Omupresidende ti indile omawiliko gosikola naanasikola ya kwate nawa omaliko ngaka.
Osikola ompe oyi na okukala ehala moka mu na eilongo lya nuka po, ndyoka tali ndungike aanona ya ninge aanandunge naantu yi ithikamena po taya vulu okukandeka omashongo ga taalela oshilongo. Shi nasha naavali, ota ti oye li aandungiki yotango yaanona yawo, oshoka oyo taye ya putudhile omaihumbato, oohedhi nomikalo dhopaantu paendondo dhopetameko.
Ngele aanona oye na omikalo notayi ihumbata nawa, omupresidende ta yelitha, ohashi ningi iilonga yaalongisikola iipu.
Onkee osikola oyi na okukala nomulandu gwemanguluko,opo aavali noshigwana shi vule okugandja omayele shi nasha newiliko lyosikola.
Osekundosikola Mwadikange Kaulinge oya lukilwa gumwe gomapendafule gaakwiita yOmukwaniilwa Mandume Ndemufayo, mboka ya lwitha omatanga gOmuputu, Aaingilisa oshowo Oombulu. Omusita Vilho Mwadikange Kaulinge gwaElcin ngoka a manene oondjenda dhe muKotoba 1992 okwa li wo mwene gwotango gomukunda Ondobe moka mwa tungwa osikola ndjika.