Katima Mulilo
sitanda somodoropa za Katima Mulilo ngesi tasi zeguruka nye nomosondaha, yipo vapulisire vantu vaninke ngesefa. Ntumwaraka ezi kavazigeve posigongi esi kava kere nkuruministeragono, Dokotora Libertina Amathila nova kurukadi ava ava randesere mevango lina.
Amathila katulirepo sigongi esi yipo alimone nova kurukadi ava yinatamba.
Age kaka mundindilireko nguuru gomukunda Caprivi Leonard Mwilima. Apa kazegwilire sigongi Amathila kageve ruguwo rwendi asi morwa sinke ava patere sitanda mosondaha.
Age kayi mutetukusire mokumona sinzi sova kurukadi kuna kurandesa momutenya,nsene asi sondaha, nokutanta asi egano lyo kutunga yitanda kwawizirapo morwa yeeyi ngavamono vakadi vana kurandesere moyitarata. Vahepa kupaturura sitanda esi vantu varandese nawa.
Ntani vahavafutisa ndiro. Nsene vavafutisa ndiro ngesefa zawo kapi tazikuru. Awo kufuta morwa sinke nava vapaterere mosondaha. Nsene ngoso vagusenye evango lyawo ose tutungeko lyetu. Age kavatumbwidilire asi nakauuyunga noministeli zoruha oro, yipo vayakona – kone udigu ou.
Esther Sankwasa na Georgina Mwiya kava kererepo ndango zo doropa kavatente asi ewizopo lyepato sitanda mosondaha kwalitulisapo vangendesi sitanda nondango gendesi doropa. Ano nsonso nazo kukwama asi ngesefa musinke arandesa muntu ogo. Yiponye vatokora asi yimaliwa eyi vayitulire ntere, yipo vawapayikiseko evango. Ntani yiyo kavatente asi nare vaturapo etokoro asi sitanda esi sipaturuke nomosondaha.
Gumwe arandesere pevango lina katente asi eturopo yimaliwa eyi kapi lyawapa awo kufuta yimaliwa yoyinzi. Yimaliwa eyi avafutu kutamekera po N$70 dogoro N$2000 mokwedi. Wonongesefagona kuna kumona udigu. Awo simpe kava geve esivano asi vanayirongo nawo kuna kurandesa hena moyitarata. Awo yipo kavahundilire epangero liturepo veta zokusilika vantu vaharandesera moyitarata. Simwe hena kava tumbwire ewapukururo mbunga zovakadi vana kutumbura asi “Women Empowerment Forum” ezi zina pilimo momukunda.
Mbunga ezi kwazitamekere vagolikadi vakara mo mbongarero zanavenye asi vavatere vakwawo mekuliko. Ano mbunga ezi kwadongonoka morwa kwato egendeso lyewa. Yipo asi vana hara vava vatere vatungurure mbunga ezi.