I Kae Matundu-Tjiparuro
OTJOMUISE
Omuhonge omunene nomuute wombongo indji o Zion Christian Church, ousupi o ZCC, Uavaza Kaposambo, masuvisiwa muhuka kongotue yombongo onguru yOruhindo mOkahandja.
Omuyaruke Omuhonge Kaposambo, nguri omukwatua wonganda ya Katjamuaha, masuvisiwa puna ihe Kavezeri Tjamuaha, Mainuua Tjamuaha, Nikodemus Kambahahiza Kavikunua, Wilhelm Uaita Maharero no fieldmarshal yovimbumba vyovita vyOmbara Samuel Maharero, Riarua Ruhumba. Ihe wari Kaposambo omwatje wa Tjamuaha omwangu woo Kavikunua na Maharero waina warwe. Ina wari omutena wa Tjamuaha notjeri omusia wa Tjamuaha.
Omuhonge omuyaruke Kaposambo wekurisiwa omwiingona iinyangwe Frederick Maharero notjomukwatera wonganda ya Tjamuaha wina arire orata mOtjauana mozondendera za Mahalapye makwaterwa mOtarive mo 1923 ombura Ombara Maharero mata. Wakara norupa movitjitua vyomuhoko narire okanepo koruhindo rOmbara Frederick Maharero okuyenda kOmbara yOvatjauana, Seretse Khama, okukakondja notjiposa tjOvaherero.
Wina wari okanepo koruhindo rombara nduahakaena nomuhonge, Michael Scott , mOtjauana. Scott tjazumba otjeya nguno nombuze yOmbara Fredeick Maharero kOmbara Hosea Kutako. Okuza indu Kutako tjatjangera Maharero natja: “Ozoseua zoo iho zeri poo kuyekwa otjirumatua tjazo mena rokutja katuhungire neraka rimwe tuapizuka.
Munao otjimapeya otjirumatua tjetu atjiwire momake waimba mbutuhavanga.” Mo Namibia Scott weekurira omuhindua wozombara azeembari pokati ka Tjauana na Namibia.
Kombunda Scott wahindua kOmihoko Omikuatasane nonguta yozombara yorutuu romitjemo kukwatuwa ominwe kembo mEpako, Okahandja na Tjomuise. Wina wakaenda nouhatoi mbwaza movinyo vyovandu oveni. Inga ongari omautiro wotjirwa kunohoromende yohuurire ya South Africa.
Mozombura inda ndumazeutire mo 1970 eye otjee kuuta ombongo indji o Ziona naungura nomasa airire imwe yozombongo ozonene mozombongo nderi kuramena.