WINDHOEK
Omupresidende Hifikepunye Pohamba netine lya zi ko okwa li a tseyitha pambelewa mOvenduka etameko lyeinyolitho lyaakondjelimanguluko aakulu, ano omapendafule giita yekondjelomanguluko.
Kakele, omainyolitho gwoyene oga thanekwa okutameka mOmaandaha, eti 21 Juli 2008 miitopolwa ayihe 13 moshilongo. Pohamba ota ti enenedhiladhilo lyeinyolitho okutota po omukanda gwomadhina goonakulwa aakulu ayehe nelalakano okugandja eyambidhidho kumboka ya gwanitha po iipumbiwa nenge uuna omapendafule ga mana oondjenda, kugandjwe eyambidhidho koonakuthigwapo aapambele yoonakusa. Einyolitho otali ka ningwa wo okungonga po embo lyopashigwana lyomadhina gwomapendafule giita, ndyoka tali ka longa okuwilika omathaneko gomapendulopo nomilanduveta.
Omupresidende ota ti egandjo lyomakwatho koonakulwa aakulu mboka ya gwanitha po iipumbiwa oshi na okutalika ko ongomukalo gwokukaleka po ombili nengungumano moshilongo. “Shika oshi na wo okutalika ko ongoshitopolwa shoonkambadhala dhetu okukaleka po oshigwana sha kwatela mo aantu ayehe moka tatu yambula po uuyuuki wopankalathano nesimaneko lyuuntu womuntu.”
Pohamba ota ti oshi na okuuvika ko nawa kutya omayambidhidho gopashimaliwa otaga ka kala ga yooloka shi ikwatelela koongundu dhomapendafule ngoka ga gwanitha po iipumbiwa.
Omupresidende ota ti omolwompumbwe yoonzo dha ngambekwa, ano inadhi ihwapo, omakonakono otaga ka ningwa kushilipalekwe kutya oomboka ashike ya gwanitha po iipumbiwa ngaashi tayi uthwa mOveta nomalandulathano gayo oyo taya ka mona omauwanawa ngoka ga dhiladhilwa.
Poshituthi osho tuu shoka, Ominista yIinima yAakandjelimanguluko okwa li a gandja uukalata une kaantu yayooloka, Omukokolipresidende Sam Nujoma, Omupresidende Hifikepunye Pohamba, ngoka a li nale ominista Herman Toivo ya Toivo oshowo ependafule Ida Jimmy. Omusamane Nujoma ngoka oye a pewa tango okakalata kuukondjelimanguluko, ota ti Aanamibia omayovi oya lemanekwa komalutu oshowo oyendji oya kanitha omaliko gawo nokuthigwa moluhepo lwamatutu molweyambidhidho lyawo lyiita yekondjelomanguluko mewiliko lyoSwapo.
“Onkee osha gwana nosho opala opo tu simaneke mboka yi iyambela ekondjelomanguluko okuya kwathela nokuya yambula po pamwe naapambele yawo pankalathano nopamahupilo opo wo ya vule okutyapula iiyimati yemanguluko.”
Nujoma ota ti einyolitho ndika olya simana opo Epangelo li dhimbulukithe oshigwana, omapipi gomonakuyiwa oshowo uuyuni auhe kutya emanguluko lyoshigwana/oshilongo inali za pokapala ka yela.
“Olya ya moomwenyo dhondilo, ombinzi nomazigudhe gAanamibia omapendafule, onkee otu na okutsikila okugamena ashihe shoka sha etwa po kemanguluko lyetu lyoshili.”
Ominista yIinima yAakondjelimanguluko, Ngarikutuke Tjiriange, okwiindile aakondjelimanguluko ayehe ya ngungumane nokwiidhidhimika oshoka uuministeli we otawu longo wa mana mo opo wu shilipaleke kutya iinima ayihe oya tulwa pomahala.
Ota ti inashi pumbiwa aakondjelimanguluko ya ye kuuministeli pethimbo ndika opo andola ya ka konge oofoloma dhomainyolitho molwashoka omalandulathano gokunyolitha oga longekidhwa nale.
Okwa tegelelwa einyolitho lyomapendafule giita li ka pupaleke iilonga yuuministeli mbuka okunyola ondjokonona yi ihwapo yiita yekondjelomanguluko.
“Otwa hala aakondjelimanguluko yolela aamati naakadhona, oluvalo lwevi ndika lyomapendafule ye tu lombwele lela shoka sha ningwa po naampoka sha ningilwa.” Uuministeli wIinima yOonakulwa Aakulu owa totelwe po muKotoba 2006, naTjiriange ota ti opwa kakukwa oonkatu dhontumba momukalo gwokuungaunga nomaupyakadhi ga guma aakondjelimanguluko.
Uuministeli owe shi pondola okuudhitha omahala giilonga ngaashi ga ziminwa kOmbelewa yOmuprimaminista, nopethimbo ndika iitopolwa 13 moshilongo oya topolwa miikandjo ihamano.
Oshikandjo shotango osha thikama po miitopolwa ngaashi Erongo, Kunene nOtjozondjupa, omanga oshikandjo oshitiyali shi na ashike oCaprivi noKavango.
Oshikandjo oshititatu osha kwatela mo Khomas nOmaheke, omanga oshitine mu na Oshikoto nOhangwena. Oshikandjo oshititano omu na Omusati nOshana, omanga shahuguninna oshitihamano mu na oHardap noKaras.
Iikandjo ayihe ihamano oyi na aakalelipo yuuministeli mbuka, naTjiriange ota ti omalongekidho oge li metifa okutula po aakalelipo yopambelewa moshitopolwa kehe opo ya ungaunge nokuwilika egandjo lyomauyelele niilonga muuministeli. Ngoka a li nale ominista yuuyuuki ota ti osha simana okuhedhitha iilonga nomayakulo guuministeli popepi noshigwana molwaashoka aakondjelimanguluko oyendji oye li taya kulupa nenge yamwe ya nika omaunkundi nosho tuu.
“Ngame otandi popi aantu mboka ya lemanekwa paendunge nopamalutu kiita mboka tashi vulika kaye na we omatha nenge uukolele, onkee osho opala opo tu hedhithe omayakulo getu popepi nomapendafule ngaka aamati naakadhona.”
Oshituthi shetseyitho pambelewa lyetameko lyeinyolitho lyaakondjelimanguluko osha kalwa koongoloneya yiitopolwa, oominista dhOkabinete oshowo aaunganeki yongundu yoSwapo miitopolwa.