BAYAHI ba munda bene ba nyemile neba kile ba yowilikana ni kutaseza nkambe ya bona ka kunga lico za munda zene beilwe mwalibaka zen`wi isi ka mulao, kunataka maofisa bene bali fa musebezi ni kuba tama. Sipangaliko se, nesi ezahezi mwa mutulo wa naha India mwa mazazi a cwale.
Kuyowilikana ne ku tile muta mezi a munda a man`wi a tisa likayamana hape kwa bayahi ba likiti-kiti mwa mbowela wa lifasi la Asia.
Mafu mwa mutulo wa India na kile a pahama ni kuyema fa batu ba 83 kubeya palo ye mianda-nda yene siyezi mwa likayamana la mezi muta mezi a pula a esha.
Maofisa mwa mbowela wa Asia ko palo ye likana 800 ya batu se tibile mwa likweli ze felile, kapa kushwa kalika la kulumiwa ki linoha, lukupwe kubeya matuku a man`wi a mezi, neba kile ba bulela kuli banze ba lika katata kamo ba konela kaufeela kono seba palezwi kulilimanisa matuku asa takalala cwale kwa likamba.
Mwa tolopo ya Bihar ye taluswa kuli ina ni palo ye pahami ya batu baba shebile ahulu, mianda-nda ya bo lyaminzi ne kile ya I taseza ni mapokola ni kutumusa linonge za bona za kufiwa lico ze n`ata mwa libaka ze shelana, maofisa ni bo lu bona ka meeto neba kile ba patalaza.
Likezo za kulwanela lico ni kuamuha lisebeliso zen`wi hamohocwalo ni kuswala mapokola ba ban`wi neli kilwe za bihiwa ni mona.
“Sabo ya kutobela ki lico ze lu sweli cwale ze nyinyani selu amuhile buloko,” lyaminzi Ram Uday Singh na kile a bulela kwa nkambe yeli mwa Bihar mwa silalanda sa Begusarai.
Pula ya simbwewewe yene kile ya suluha mwa mazazi a felile ne kile ya tisa likayamana ni ku tibisa mandu a man`wi a manca ni mwamulenen`I wa Patna, maofisa neba kile ba bulela.
Ka lonji mwa silalanda sa Khagaria neka kile ka suluhela ni kutibisa batu ba supile.
Mwa mulenen`I wa Kolkata mona, ili mulenen`I o mutuna o fumaneha mwa mutulo wa naha India, mezi a pula nanza sa zwelapili kutibisa mandu.
Palo ye likana 30 ya makulano a butuku bwa chikungunya na kilwe a bihiwa kuzwelela mwa mulenen`I o swana kakuya ka lipiho za maofisa.
Butuku bwa chikungunya bu tiswa ki kulumakiwa ahulu ki minan`i.