WINDHOEK
Ookompiuta oshowo omashina gamwe ngoka taga yakwa moombelewa dhuuministeli momahangano ngoka ga yama kepangelo otashi vulika dha mona omalandithilo ngoka ge dhi tegelela konyala esiku kehe moshishiindalongo Angola.
Pauyelele woonzo dhi shi okwiinekelwa, iilongitho yopautekenika mbyoka hayi uhala tayi yakwa moNamibia oya fa yi na aalandi moAngola moka hayi landithwa kondando yondilo. Metitano ongula oombelewa dhoshikondo shomayakulo giimuna mOvenduka mepandaanda Robert Mugabe, okwa li dha teywa noobotsotso odha yaka mo ookompiuta dhongushu N$50 000 lwaampoka oshowo uukalata wokudhengitha oongodhi (flexicall cards) wongushu yoshimaliwa N$200.
Uufuthi mbuka owa thigi omakende gomatungo ogendji, uutalalisa wopomakende oshowo omiyelo hamano dha teyagulwa. Shika oshikando oshitiyali omateyo ngaka taga ningwa konima sho momasiku 16 Mai nuumvo ookompiuta dhongushu N$20 000 kwa li dha yakwa po. Omundohotola gwIimuna gwEpangelo, Siegfried Khaiseb ota ti: “Oobotsotso odha teya ekumba lyomuyelo nguka noshinima inashi tseyika nokuya metungo, tadhi teya omiyelo dhokomeho goombelewa. Otwa hala okuuva kutya osekuliti oya li peni pethimbo aantu taya yaka, oshoka otu na uupyakadhi woosekuliti hadhi ya kwatoka kiilonga,” Dr. Khaiseb ta ti.
Omishangwahokololo dhOpolisi otadhi ulike kutya oombudhi odha kala dha shoneka unene ookompiuta dhEpangelo oshowo oombelewa dhomahangano gaaniilonga nUuministeli wAagundjuka, Omaudhano nOmithigululwakalo, Uuministeli wOmidhingoloko, Uuministeli wIipindi, Ombelewa yOshitopolwa shaKhomas, NBC, Rossing Foundation, NAFWU noNATAU.
Opolisi yaNamibia otayi konakona omakwatathano ngoka tashi vulika ge li po nomalanditho moAngola. Otaku fekelwa kutya oyindji yomiinima mbyoka hayi yakwa otashi vulika hayi ka landithwa po okupitila mokangundu kaalongi yiikulumuna hoka ka longekidhwa nawa moAngola. Omupopiliko gOpolisi yaNamibia, Shisande Stefan Nuuyi , ota ti oya koneka omateyo ga ningilwa oombelewa dhOshikondo shEpangelo shi nasha nOmayakulo gIimuna.
???_?_’???_?’???_???