MoVenduka-Presidente Hifikepunye Pohamba kahundilire vanafarama womoNamibia valiwapayikire yipo vature magano gawo moyirugana moomu vanagaharere.Mosiuyungwa sendi esi karesere ministera gonondima nounsitwe posiruwo sezegururo paveta epongo lyenene ndi asi congress zoNNFU.
Pohamba katente asi Namibia sirongo soruteni sina hepa unandima ou una kara asi kuna kudemenena poyininke yongandi.
Morwa mukaronye ogo vanafarama vahepa kuvadeura ponomukunda,ndi pantambo zokuzeruka, morwa mukaro ogu gokukara asi nkenye ogu pwamwene kapi nagututwara komeho.
Unandima twahepa kuukunga yipo vantu vakare noudivi ndi nokuvavatera eyi navavhura kuruganesa.Age katente asi muzangu gomoNamibia kugurandesa poyirongo yoponze,ntani hena vantu kuna kuyimona asi muzangu gwetu muwa yipo asi kapisi tukarere tupu kurandesa monda zosirongo nye twahepa kupwagesa eyi tuna zangura tukarandese ponze zosirongo yipo nose tukarumbasane novakwetu.
Presidente katente asi mbunga ngwendi zoNNFU,kwazidiva nawa nahena kwakara noyiruganeso yazo yipo asi vahepa kugwana udivi naunye ou ava ruganesa vakwetu moyirongo yawo.
Ose kuna kara mouzuni wonokompuyuta,yipo asi twahepa kudeura vahameni vetu vadive asi ngapi una kulinyunganga uzuni.
Pohamba katente hena asi unandima yiroruha rumwe runa kara novarugani wovanzi nahena ekonomi lyetu pwelike lina demenene.Yipo nye asi ame kuna kuhundira ava vana kara mounandima varuganeko yumu vasikisemo nzodi zetu zokukulika sirongo monomvhura 2030.
Nahepa hena kuyitambura asi unandima udigu neyi nakuuyunga ngesi vanafarama vetu kuna vatamba rukukutu.Age katente asi epangero mokupitira mouministeli wonondima kuna kuvatera vantu ava vana kulituramo vene monondima yipo asi vawapukurure ekonomi lyosirongo.
Epangero ngesi kuna lituramo mokupitira melikwamo eli vana kutumbura asi Green Scheme vawapukurure ekonomi.
Age kahundilire mbunga ezi zoNNFU valituremo mokutantera vantu vawo asi vavatere epangero mokufatwilire vantu elikwamo lyoGreen Scheme.
Kuwapayika vanndima hawe kuvhura tukare noekonomi lyawe.
Age kapandwire mbunga ezi zoNNFU meruganeno lyawo kumwe nepangero kupitira mouministeli wonondima.
Age katente asi kavamutanterere asi mbunga ezi zoNNFU nezi zaNAU, kumwe nombunga ezi vana kutumbura asi National Emerging Farmers Forum mokupitira mombunga ezi vana kutumbura asi JPC,yipo vaturepo ngano mbunga zimwe tupu zovanafarama.
Ame pwanyamwanga kuna kumuhundira asi uwa nsene murugana ngoso murete vana farama vaNamibia vakare nombunga zimwe tupu.Kapisi ngomu tuna kara ngesi sirongo simwe tupu nye nombunga kuna kuvhuka nositambo simwe tupu.
Epongo eli kalikere nositumbura asi wapayikeni vanandima, morwa meho zetu yimo zina kara.Epongo eli kwakereko sivike esi kasipwire mositata saVenduka.Pokuhulisa awo kavahorowere vampitisili wovape.