WINDHOEK
Nonkembadhala okuyamukula kompumbwe yaapangi miipangelo nomahala guundjolowele moshilongo, Oshimpungu shUuhaku nUudhindoli wUundjolowele moshiputudhilo shelongo lyopombanda shaNamibia, UNAM, osha tokola okugwedhela aalongwapangi yasho omvula kehe. Omukuluntu gOshimpungu shika, Lischen Hoases-Gorases, okwa kundaneke oshifo shika kutya omuyalu gwaalongwa hayi inyolitha moshiputudhilo shika ogwi indjipala okuza paalongwa 20 omimvo dha zi ko sigo aanongekwa 120 muule woomvula mbali dha pita. Shika okwe shi talela mompumbwe onene ndjoka yi li po. Okwa yelitha wo kutya omikithi ngaaashi oHIV/AIDS oshowo oTB otadhi pumbwa aaniilonga ya pyokoka miimpungu yayooloka yuukalinawa.
Omanga nee Oshimpungu shUunamiti nUunongononi wUundjolowele hashi gandja oodiploma noonzapo, omukuluntu goshimpungu shika ota ti oshiputudhilo oshi li momalongekidho okweeta po oonkatu dhopombanda (undergraduate degrees) muunongononi wesiloshisho lyopauhaku oshowo okulonga nomashina gokuthaneka omalutu andola kuyele omvula tayi ya.
Oshikondo shuuhaku osha kala omimvo odhindji sha taalelwa kompumbwe onene yaaniilonga ya etwa ketembuko lyaanambelewa oku ka konga uunapelo nomahupilo ge li nawa. Omolwoshinima shika, omvula ya za ko, aapangi 103 okuza koKenya okwa li ye ya moshilongo okukwathela okukandula po omukundu nguka.
Momahala guuhaku gepangelo, omvula ya zi ko, omwa kala ompumbwe yaapangi 525 mboka yuulongelwe wopombanda (registered nurses) oshowo omwaka gwaapangi yondondo yopevi (enrolled nurses) yomuyalu gu li 975. “Tse itatu vulu okukala aluhe twi ikolelela kaanambelewa yiilongo yilwe, otwa pumbwa okukala twi ithikamena po,” Gorases ta ti.
Omvula ya zi ko, aalongwapangi 125 okwa li ya piti nokupewa oonkatu dhawo moshimpungu shika naGorases oku na etimwaumbwile kutya omuyalu nguka otagu ka koka monakuyiwa. Ota ti omadheulo negandjo lyomaunongo olya ya pombanda naalongwa oyendji oshowo aalongi momadheulo miimpungu ya guma ekeelelo lyoHIV/AIDS, ehungomwenyo, eungaungo nomikithi dhaanona, aakuluntu, aagundjuka oshowo iimpungu yilwe.
Ota ti oshimpungu she ohashi longele kumwe niiputudhilo yopondje yoshilongo ngaashi International Training and Education Centre (ITEC) ndjoka hayi gandja aanongeki yopakathimbo oshowo iilongitho. Oshimpungu shuuhaku oshi na aalongi 16 koshiputudhilo shawo shokoNooli omanga mOvenduka mu na aanongeki 23. Kakele koonkambadhala okunengeneka omukundu nguka, oshimpungu osha taalelwa keshongo moshimpungu shetulomiilonga lyontseyo yesiloshisho lyopaunamiti. Gorases ota ti ope na ompumbwe yaanongeki yiilonga yuunamiti mboka ye na andola okuulikila lela aalongwapangi kombinga yiilonga yoyene yoshimpungu shika – andola omunongeki ta longo pamwe nomulongwapangi gumwe nenge yatano.
Shika ohashi shilipaleka lela kutya aalongwapangi otaya likola ontseyo ya paka nokumona eyambidhidho kaalongi, naashika ohashi shilipaleke kutya aalongwa oya pewa ontseyo yi ihwapo.
Gorases oti indile Uuministeli wUundjolowele wu kwathele mokudheula gaanongeki moshipungu shuukalinawa nuunamiti. Oshimpungu oshi na natango ompumbwe yoolaboratori oshoka omahala ngoka haga longithwa pethimbo ndika kage shi lela oolaboratori.