WINDHOEK
Omuprimaminista Nahas Angula ota ti ongundu ompe yopolotika ndjoka opo ya totwa po nokunyolithwa nOkomissi yOmahogololo metitano lya zi ko, yedhina Rally for Democracy and Progress -(RDP) itayi ka kala endangalati kOngundu yoSwapo, ihe otayi vulu okukala ya nika oshiponga konkalo yombili nengungumano moshilongo. Moonkundathana noshifo shika mOmaandaha, Angula ota ti oRDP ndjoka ya nyolithwa kungoka a li nale oshilyo shongundumutima yoSwapo nokwa li ominista, Jesaya Nyamu, ongundu ndjika ‘ongundu ashike pambapila’ ndele kayi na oonkondo okushonga ongundu yoSwapo monakuyiwa yopopepi.
Omuprimaminista ota ti ke wete etembuko enene lyiilyo iikuluntu okuza moSwapo. “Otandi dhiladhila kutya otashi vulika iilyo yoparliamende okuza itano sigo 10 yi thige po ongundu yoSwapo nokundjoina ongundu ompe.”
Angula ota ti oRDP ongundu yehololomadhiladhilo tali ningilwa omuntu gwontumba ndele kayi na omakankameno gayooloka kungoka gwongundu yoSwapo. Okwa yelitha wo kutya omukundu omunene ngoka gu li po ogu nasha ashike negameno lyonkalo yombili moshilongo oshoka omuthigululwakalo gopapolotika miitopolwa ine yomuumbangalantu woshilongo itagu ka pitika omainyengo gopapolotika ga ende pambili.
Omuprimaminista ota ti ngele oRDP oya tokola okulongitha uuhahu, otashi vulika yi ka kandekwe noshikanyauko okuza miitopolwa yimwe yoshilongo, ta gwedha po kutya iitopolwa yimwe otashi vulika yi ka ningile aantu yontumba oondjindikila nosho tuu. Ta ti oRDP ongundu yaanapolitika mboka ya geyithwa notayi vulu okuhila aantu oyendji okuza koongundu dhimwe dhompilameno. Ota ti ongundu ndjika otayi vulu okukala ya mona omawi goopelesenda 20% okuza kaantu mboka ihaya hogolola oSwapo. Angula ta gwedha po kutya ongundu ndjika otayi ka nana nondatu okuhila aantu oyendji, okuninga shila tayi eta po ooproholama oompe notadhi hokitha unene oshigwana shaagundjuka. Ota ti kakele, oSwapo nayo oyi na wo ompito nomatha okweeta po ooproholama dholudhi ndoka. Angula ota ti ye oku na ashike ohokwe okukundathana opolitika yongundu ye, oSwapo, peha lyokudhiladhila shi nasha nongundu ompe.
Pakutala komusholondondo gwongundu gwomadhina gaantu ya nyolithwa nOkomissi yOmahogololo moNamibia (Electoral Commission of Namibia -ECN), oyendji yomiilyo iipe oyo mboka ye li aatengauki okuza mongundu yoSwapo. Aantu ya konda 100 okuza momusholondondo gwomadhina 755 oya za kiikandjohogololo ngaashi Gobabis, Epukiro nOtjombinde. Okuniwe eitaalo kutya aantu mbaka oye li iilyo yoSwapo mOparliamende mboka ye li mekuyunguto lyopamuhoko gOvambanderu moka mu na etopauko ndyoka wo lya ya mongundu. Ovambanderu oyendji oye li iilyo yoSwapo nenge aayambidhidhi. Ekuyunguto lyomuhoko gOvambanderu olya kwatela mo Elenga enene Munjuku Nguvauva oshowo Elenga Erastus Kahuure.
Otaku tiwa kutya Omupresidende gwOngundu yoSwapo, Sam Nujoma oku li kombinga yaKahuure onkee iilyo mbyoka tayi yambidhidha elenga ekwawo otashi vulika yi ninge etokolo okuthiga po ongundu ongonkatu yehololo lyeiyuvonayi.
Omapopyo otaga ti iilyo yimwe iikuluntu okuza moshitopolwa oya kala nokunwetha mo aagundjuka moshitopolwa ya ndjoine ongundu ompe, omanga yo ye li natango taya mono omauwanawa ongiilyo moparliamende.
Oshitopolwa shaHangwena namo otaku tiwa omu na aantu oyendji ye na omadhina ge li momusholondondo gwongundu ompe. Mboka taya tembuka otaku tengenekwa kutya oye li iilyo yoSwapo mbyoka yi li ompinge newiliko lyongundu omolwiinima yontumba. Omayoolokathano moshitopolwa okwa talika taga dhana onkandangala mOhangwena niinima mbika oyi ikwatelela kuukwazimo, oshoka ope na yamwe ya pamba Omupresidende, Hifikepunye Pohamba omanga yamwe ya thika puHamutenya. Ongundu yomadhina ga za kOranjemund otaku fekelwa ga nwethwa mo kuyamwe yomaawiliki aakulu yomahangano gaaniilonga mboka ye na natango aalanduli aaniilonga yomomina mondoolopa ndjoka.
Okuniwe eitaalo kutya omuwiliki gumwe omukulu gwomahangano gaaniilonga okwa li a talela po Oranjemund ongoshilyo shoSwapo nokwa nwetha mo iilyo yi ndjoine ongundu ompe.