MoRundu
Ndango zodoropa zaRundu kuna kara moudigu kutunda tupu apa kavayadimbwilire asi kampani ezi vapa sirugana sokudamuna yihando kapi zakara noyiruganeso asi ngano varugane yirugana eyi vazipa.Likilikile kampani kwazipa sirugana sokututa yihando modoropa kutunda tupu mokwedi kwaSikukutu mvhura zeezi.
Kutunda tupu opo kampani ezi kwakerera tupu kudamagura yiplastika yoyisovagani pomambo,mokukwama euyungo lyomukurona godoropa ezi Mandema Sikerete.Sikerete katente asi kansela zendi nayimwesi naziruganako morwa kampani kuna kugava matumbwidiro gomadona asi nsene kapi vana kutwikira ndi asi vavaguse sirugana esi awo kuvhura vatware ndango kompanguro.Ano ndango kapi zina kara noyimaliwa yokufuta nsene asi vavatwara kompanguro.
Mokukwama malizuvho vatulire patjangwa ndi asi mehundiro awo kwatumbwire nayinye ndi asi kwasikisiremo nayinye,nye konyima ntani twayadiva asi kampani ezi kwato yiruganeso yasikiliramo.Ose twavatantera asi vahepa kudamuna yihando nayinye nye awo yooyo tupu yoyisovagani yiyo ava damuna pomambo.Mwenya kampani nare gapuravahahende vendi nye nare valimburura asi awo kapi vavatantera asi vadamune nkenye sihando.Nokutantera ndango asi morwa yizo zina hara kuhagekesa yirugana eyi vahepa kudiva nawa-nawa asi yinke nayikwamako.Morwa tuna tjiranye kuza kompanguro ose yiyo tuna kuvaruganesa nye ngorooro.
Kampani ngesi kuna kuza zikahageke yirugana yazo mwaSindimba mvhura zeezi,nye azo kugwana N$33 500,00 mwankenye kwedi ezi azi tundu kondango zodoropa.Sikerete katente asi ndango zodoropa kazitokwere asi vahepa kufuta kampani ezi ukahe morwa tavahorako kovarugani vazo ntani ndango zodoropa kuna kugavako yihauto eyi navakalivatera nawo mokudamuna yihando.Morwa mukaro nye gwangoso doropa kuna kuzumbanesa mukaro gwazo gokuzera,nye tatu wiza tupu.Ndango zodoropa kapi zagwana yimaliwa eyi zafira kugwana kepangero nye kuna kukondja kuruganesa yanyamwetu.Nye udigu wowu asi yimaliwa eyi yisesu kapi tatuvhuru kurugana nkenye eyi tunahepa ntudi kuna hara tupu kureta udigu.
Age kagwedereko asi ndango zodoropa zarugana unene dogoro yiyo zamana kufuta makongo gazo naNamwater.Udigu womema nare wagusa,vagapata vapaturura morwa udigu wokupira kufuta ndango zodoropa zaRundu,nomiliyuna donodola. Ano ngesi tuna yoworokamonye.