I Kuvee Kangueehi
OTJOMUISE
Opresidenda Hifikepunye Pohamba oo muvarekwa wo Swapo erike mo matoororero wotjiuru tjehi ekeweze re rokunana tjirayanda mu Seninarindi mo 2009.
Otjira tjo Swapo tjayauzire nao pombongarero yatjo onene oitjaine ndjeere komayandero Oritjatano ndazuko. Ongutiro indji yakoza omahaka yokutja Pohamba tjii hapo maheruka kounane poo indee kombunda yekweze indi?
Mapehee kutja Pohamba nambano mazako kounane mo 2014 tjandje oruveze indo ovanane ovengi ovakuru votjira vatuapehi ondjoke. Wina ihi mapeya atjihee kutja oruveze indo omuvarekwa kounane wehi wo Swapo mazu momitanda tjimuna Abraham Iyambo, Saara Kuugongelwa-Amathila poo Uutoni Nujoma.
Ombongarero indji yaningirire ounepo wotjira nawina ovakwatera vehi okuyandja oruvara ku Pohamba okurira opresidenda yehi mo 2009. Orutu romondivitivi rotjira rwaningirirwe iyombongarero indji okutua ongutiro indji momaunguriro.
Wina ombongarero indji yakutire kutja omunane wehi mayandje ondjozikiro ndjapwire nu onene kOnongo Sam Nujoma. Okomiti maisembamisiwa okutara morupa Nujoma ndumakara naro motjira nomwano mbukakara nawo norupa indui.
Nandarire kutja osaneno yotjoiungura tja Nujoma ngunda kaiyakahuka, eye matjiukwa kotjiveta otjo “Munane wOtjirwa tja Namibia” nakara namausemba noukutuke otja korutjato rwe okukara pozombongarero zotutu kanganwa totjira tjinene nene orutu rOmondivitivi norovitjitua vyeyuva.
Otjira wina tjaraisire ongendo yatjo ko kuhina nduviro kounepo tjiva natjiraa korutu romondivitivi kutja rutare momazeva yomeritjindiro nawina momirari vyo kupeta.
Ombongarero yaraisire ohange yayo nongaro ombwa pokati kotjira nehika rouvaungure o National Union of Namibian Workers (NUNW) otjorutu orurikute kotjira natjipe orutu indui ousemba ouwkizikwa wokanepo karo kemwee okurira okanepo korutu romondivitivi. Posyo ombongarero indji yaningirire o NUNW kutja okanepo inga kerire okatakame motjira tjo Swapo. Yaningirire orutu rOmondivitivi okurundurura ongundeveta yotjira tjo Swapo okutua momaunguriro ongutiro indji.