“Natu kaleni noondjila inadhi holoka iiponga momumvo 2007,” osho Omuprimaminista Nahas Angula ta indile. Eindilo ndika okwe li ningi poshituthi shegandjo lyomathano gokukwata ondapo yiihauto gongushu N$53 000 ngoka ga pewa oprojeka yoshikonga shEgameno lyOmoondjila shedhina Xupifa Eemwenyo sha ningilwe mOmaandaha.
“Etumwalaka lyandje kaahingi – kutya nee oye li mondjila onene ya thinda konooli nenge kuumbugantu, nenge yu uka kuuzilo nenge kuuninginino – kutya oondjila adhihe odhi li montalelo ano kotokeleni ondapo yeni.
Natu kambadhaleni opo Okrismesa yonuumvo yi kale yi shi okudhimbulukiwa.”
Ethimbo ndika olyo aluhe unene hamu holoka iiponga yomoondjila mbyoka hayi faalele oomwenyo dhaantu kaa ye na ondjo.
Nonkambadhala okushunitha pevi iiponga yomoopate nokuhupitha oomwenyo, ehangano lyedhina Extract Resources, ano okampani youranium moNamibia olya gandja omagano gokapandi N$53 000 okulanda omathano gokukwata osiputa yiihauto kOpolisi yaNamibia ongoshitopolwa shoprojeka yEgameno lyOmoondjla – Xupifa Eemwenyo.
Omukuluntuwiliki gwehangano ndika Extract Resources, Peter McIntyre, ota ti omagano ngaka oge li oshitopolwa shokampani yawo shopankalathano.
“Oshi li etegameno lyandje enene kutya okupitila momagano ngaka otatu ka vula okukwathela mokushunitha pevi iiponga yiihauto mbyoka hayi etitha ehanagulo olindji kaanegumbo pamwe nookuume kawo,” McIntyre ta ti.
Mokutaamba ko omulongelo nguka, Omunambelewa Omukuluntu gOshiketha shIiponga yOmoondjila (Motor Vehicle Accident Fund-MVA), Jerry Muadinohamba, ota ti yimwe yomoompumbwe dhOprojeka yEgameno lyOmoondjila – Xupifa Eemwenyo osho omathano gokukwata ondapo yiihauto.
Sigo oompaka opwa landwa omathano ngaka ge li 10 ngoka taga ka longithwa kOpolisi poomboloka nomahala gayooloka moopate dhomoshilongo.
“Ekondjitho lyiiponga yomoondjila olya pumbwa okunyatipalekwa omvula kehe, naashi pwa monika omathano ngaka, oongalama odhindji otadhi ka tonatelwa pethimbo lyomafudho,” Muadinohamba ta ti.
Oshikonga shEgameno lyOmoondjila – Xupifa Eemwenyo otashi lalakenene okukwathela aahingi ya lundulule nokuhinga nuundalapata unene pomafudho, sho aantu oyendji ta ye ende moondjila ya thinda komafudho komahala gi ili nogi ili.
Komufala gwOpevi mOpolisi yaNamibia, Ndjayi Maritz du Toit, ota ti opolisi oya pumbwa iilongitho ya kitakana mbyoka tayi vulu okugandja uumbangi wa yela okufalitha aantu kompangu mboka taya taaguluka ooveta noompango dhomoondjila ngaashi okuhinga ondapo ya pitilila.
Ota ti inapu lopotwa natango omaso moopate okuza oshiwike sha zi ko. Omathano ngoka otaga ka kwathela opolisi okukwata aahingi yondapo yoshivuvu, shoka tashi ka etitha ya futithwe okapandi sigo N$2 000.