RUPARA –Vatungimo momukunda gwaRupara,konyara nokilo 70 koutokero waRundu,nonomukunda dakundurukida mukunda ogo kuna hara asi vahepa kuvatungirapo sasiyona gona zovaporosi morwa maumbondo nye noukorokotji una kuhoroka pomukunda.Apa nye tuna kuuyunga ngesi kuna karapo vaporosi ntazimwe vanadike notende konyima zomberewa zakansela gomukunda horowero gwaKahenge.Awo yipo ava ruganenen poopo mutenya nomasiku nye kapi vakara nehauto nampili limwe.Mokukwama kansela gomukundahorowero ogo,vaporosi nkenye apa kukara nye tavatara ukorokotji ano nsene una horoka awo kupura vatungi momukunda vavavatere kuhamena ugendero.Ngapi nye vaporosi owo navarugana yirugana yawo nsene asi awo kapi vana kara noyiruganeso.Yimo ana kupura Josef Sikongo Sivaku,kansela gomukunda horowero.
Ame nahetekerako kutjanga mbapira zize komukuronagovaporosi,Inspetor General Sebastian Ndeitunga ntani kwakomisara gomukunda ogu Olavi Auwanga, nye navenye vavali kwatanterange asi ytimaliva yokuruganesa projeka ezi simpe kapi vana yigwana.Sayitunga zaNew Era apa katu kadingwire evango eli vana kutumbura asi mberewa ndi asi nonzugo dokurara vaporosi hawe katu kamwene asi yousili notende edi kuna kara kuna kudiruganesa pavali.Kwato evango lyokuterekera vaporosi ava kutereka ponze poruzera tupu ngoso.Sasiyona zovaporosi zakara pepi kuna kara tupu zaKahenge nonokilo 20 ano zaRundu azo nokilo 70,zina kara asi ure unene.Komisare gwaKavango govaporosi Olavi Auanga katanterere sayitunga zaNew Era asi etungo lyosasiyona zopoRupara kwazihagekesa morwa valituremo asi sasiyona zovaporosi pomukunda gwaNdiyona. Twahepa kuyidiva asi pwanare kapi twakere nonosasiyona dovaporosi kutunda koMukwe dogoro Rundu sinano sina siki ko 200km.Kuna kumoneka asi vantu vatunga koutokero waRundu kuvhura varuganese sasiyona zovaporosi zaKahenge, ano ava wokoupumezuva hawe owo kapi vakere nazo. ZaKahenge kwakara pokatji kaRundu naNkurenkuru.Nampili ngomu asi wovanzi kuna kutjira asi Rupara kuna kumutulira ntere morwa nokonda vadiva vene, ose kuna kuyimona asi kutunga sasiyona poNdiyona kuna kara nonokonda dekeverero.
08 Aug 2013 – Story by Staff Reporter