ǀAEǁGAMS – President Hage Geingob ge ǂoago wekheb Wunstaxtsēs ai mîǁguibab ū!nâ hâ daoǁgauba Kabinets ǁanina ge mā, !norasasib !khamao tsî United Nations ǁga !hoaǁaredi !nâ !hūb!noras !aroma gere ǁhaob di ǁguiǂuisa !khaiba ǂhâbasa !gôasiba māsa. Nē ǂan!gâs ǁgauǁgaus ase ī ǁgauǂuisa !khaib ge Aminuis hîa Omaheke ǀKharib !nâ ǂnôas ai ǂnôa, Presidenti di ǂgans ge îb nē !khaiba dawa!khunihe mûhesa-anu !khaigu di ǀguib ase. Geingob ge nē ǁguiǂamsa kabinets ǁanina ge mā, ǀgamǁî !hū!hoas konferensis !nâ ge a ūhe mîǁguigu di sîsenǂamhes ǂnamipeb gere kabinets ǁanin ǀkha goragu soab ai.
Chief Hosea Kutakob ge ǁnā !gari-aon di ǀguib hîa ǀgaisa !âsa Hereron di !khams Duitsern !oagu ge hâ is !nâ gere ǀhuruba, Kutakob ge nē toroba 1904î kurib !nâ ǂkham khoeb ase ge ǁhao. Geingob ge ge mî Aminuis ai mâ !khaib Hosea Kutakob ǂâiǂâisens dib nî ǁkhawa dī-ūnuhe tsî ǁîb gere ǀhuru !gari-aosis !âs !hariba ǁgauǂuisa. !Aruǀîb ge Geingoba Ministeris !Hūde ǁKhawa Kō!gâs dis age ǁguiǂam îs ǀgui tamas kai o ǀgam !garo!āra hîa Aminuis ǂnamipe ǁgoera ǁgauǂuisa, îb ǁgâib Aminuisa ǀhûǁarebese ra ǂgari-aihe !garo!ās ase ǁgoe-ai hâba, ǁnā soab ai ǀoroǀorohe ǁkhā. ǁKhā soab aib ge !hūb di ǁûba ge ǁguiǂam, Kaiǁkhaes di ǁkhō!hanab nî !gâi!gâi!nâhe tsî mâǂoa ra ǀhowade mûhesa-anu!khaib !haros kōse sī-ūhesa.
“Nē sîsenna nî ai!gû-ū !nans ge nî !amǁarehe îs ǀnîkhami kō !gôab !nae!khaixa!nâ !khaiga ǀhûhâsiga xu ǂanǂui tsî mûhesa-anuxūn !khaiga kuru. Hoana ra !khōǂgās di !gao!gaob ge hoaǁae nēti ī sî nî sîsenxa kaihe,” tib ge Geingoba ge mî. Geingob ge ai!â Kabinetsa ge mîba, ǀgūǁaeb nî ôa!nâ!nansa ǁgûxan !hū!âdi ôa!gaodi ǂnamipe !amǁaresa. Nēti ī ôa!nâ!nans di sîsenǀgaugu tsî ǁgaragu ge kaise !gāsase nî ǁguiǂuihe. ǁÎb ge ǂNoaba-ao Xenerala ge ǁguiǂam, Presidenti ǁHōn ǀkha a !nao-aisa Ministeri ǀkha ǀhûǁare hâse nēti ī daoǁgauga !amǁaresa tsî tarin nēti ī ôa!nâ nî ǁanis aoǁguib tsîna māsa. Nē daoǁgaub tsî xoaǁguigu ge Geingob di berosa 16 ǂNūǁnâiseb 2018 ai nî ǁgui-ai!âhe.