Victoria Kaapanda
ONGWEDIVA – Marais Sandrag, a tseyika nawa Nakale yaNakale okwa pititha oalbuma ontimugoyi tayi ithanwa “Elungi Longhoshi” oshiwike sha zi ko.
Oalbuma yaNakale ndjoka ompe oyi na ehwata lyoongalo 17, moka yimwe yomuyo a hikile Omupresidente gwoshilongo tayi ithanwa Dr Hage Geingob, ta ti okweyi nunina omupresidente sho te mu tanga noku mu pandula kiilonga mbi ta longo.
“Ongalo onde yi hikila omukuluntu gwoshilongo Hage Geingob oshoka ota longo i itulamo, ota kondjitha oku kandula po oluhepo nonando pe na mboka ye li nasho ompinge, kape na omunakomeho iha popilwa muuwinayi”. Nakale ta ti ngaaka.
Ta gwedhapo ta ti aalbuma okwe yi luka Elungi Longhoshi, kokutya ekoto lyonghoshi, ta ti onghoshi oshinamwenyo shimwe sho sha kotoka kiinamwenyo ikwawo.
A gandje oshiholelwa shashimbungu ta ti ngele a yaka onyama oha matukile kokule e ta li kehe komeho giinamwenyo iikwawo, e te yi yakulwa, ano shimbungu ina kotoka. Onkoshi ohayi holama e tayi mana okulya kayi wetike opo kayi yakulwe shoka tayi li, ano oya lungama.
Nonande a kala ha landitha ookopi 7 000 mesiku moalbuma dhe a pititha nale, okwa ti oku uviteko egwopevi lyoshimaliwa moshilongo, ashike ongeshefa ye otayi tondoka nawa natango nando ita ningi omwaalu gu thike pungoka a li ha landitha nale.
Nakale okwa a pititha oalbuma ye yotakngo tayi tihanwa Vakwaita VokOkongo taku landula Ondjokana Ondhigu, Mokombandambanda naKumaida kohi yehanagano Omalaeti sho a tamekele okwiimba mo2008.
Mo2009 okwa li a toto ehangano lye mwene tali ithanwa Uupyu, nokwa li a tsikile noalbuma tayi ithanwa Meyaxa, Eluwa tali tende ,Kapena oshowo ndjoka a pititha oshiwike sha zi ko Elungi Longhoshi.
“Oalbuma yandje oya piti oshiwike sha zi ko mEtine ihe otayi landwa noonkondo, ongodhi yandje ihayi vululukwa otayi dhengelwa kookasitoma tadhi pula oalbuma ompe, kokutya oongalo dhi li mo oontoye onga tadhi liwa”. Nakale ta ti.
Nakale ta ti oku vite uudhigu kumboka haya ningi oongalo dhawo ookopi. Ta ti okaalbuma opo ke ye po ohaka koho ondilo noonkondo , unene ngaa ooDj ohaya kala taya dhana oongalo dha ningwa ookopi.
Ta gwedha po ta ti kehe ngoka ta ka adha e na okopi yoalbuma ye o te ke mufutitha N$50 000 kape na nando ohenda, oshoka pamukalo ngoka gwookopi omuntu otayaka oongalo dhe.
Takumagidha oshigwana ta ti nashi ilonge oku isapota shi vulithe okukengelela, ta ti sho taya kondjo niitalenti yawo okuyaka inaya hala, oshowo Opolisi yaNamibia nayi kuthe ko oongaku opo yi kale tayi patolola omajukujuku ngoka ge na oongalo dhookopi.
Nakale okwa li a gandja etumwalaka kaahikingalo yakwawo ta ti, naya ilonge okuholathana nokulongela kumwe opo ya tungathane, ondumbo kayi na mpa tayi ya fala.
“Ino hika oongalo nelalakano lyokuthigathanapo nenge nondumbo ashike hika oongalo nelalakano lyetumwalaka ndyoka wa popi mongalo nkene tali tungu oshigwana”. Nakale ta ti ngaaka
Nakale okwa li a kwathelwa okwiimba kaahikingalo ya yooloka noya shuwika nawa ngaaashi Tate Buti, 4X4 Too much power, Carlos Locos, Namaros oshowo Ishishi Papa. Oalbuma Elungi Longhoshi otayi adhika mOshakati, Ondangwa, Windhoek, Walvisbay, Swakopmund, Eenhana oshowo Okongo.
Komawuyelele galwe osho wo omapulo Nakale ota monika kongodhi 081 2213 971 nenge Aron 081 1294 664.