Omutoolinghundana
OSHAKATI – Taimi Ndapandula Jafelinu (32) oo ta pangulilwa edipao lokaana kaye kokakadona keemwedi omuwoyi okwa lombwela omhangulilo yaMangestalata kutya ye ke na ondjo.
Eshi a holoka komesho yaMagestalata mEtivali loshivike eshi, Jafelinu ka li a pewa omhito yokufatulula kutya omolwashike ta tile ke na ondjo.
Otaku hokololwa kutya momafiku eshi a li 12 Deseba 2018, Jafelinu ou eli omukwashiwana wAngola, a kwata okaana kaye momaulu, ndele te ka denge omutwe mekuma lwoikando itatu. Eshi a mana vati okwe ka umba noku ka ekela shi kombinga ikwao yolwuumbo lekuma. Okaana oko ka li monghalo ii, oka li ka twalwa meendelelo koshipangelo kOshikuku, nokonima oka ka findikilwa noambulansa kOshipangelo shepangelo kOshakati, nokutambulilwa moICU. Mupya munene oka xulifa efiku la landula ko. Oshiningwanima eshi okwa hokololwa sha ningilwa momukunda Onoolongo mOshikandjohoololwa shaShikuku mOshitukulwa shaMusati.
Eshi a holoka momhangulilo mEtivali loshivike eshi, Jafelinu okwali a lombwelwa kutya omakonaakono opolifi okwa pwa noshibofa shaye osha undulilwa komafiku 30 Juli 2019, kuteeleliwe etokolo lomupanguli-ndjai.
Eshi a holoka momhangu, Jafelinu oo a kalelwa po komukalelipo waye wopaveta Gromyko Mwala Mukasa wEhangano loLegal Aid ka li naanaa ta ulike omaliudo aye, nokwa kala mokakololo kovapangulwa a mwena. Okwa kala modolongo okudja Deseba odula ya dja ko fiyo onena. Natango ina pewa elifutile mo.