WINDHOEK- Aakalimo yomomidhingoloko ndhoka dha dhengwa koluhepo, dha kundukidhwa kuushana noshowo omakuti ga gamenwa oyo taya talwa neho lyolukeno okumona ko sha keyambidhidho lyopashimaliwa shoka sha gandjwa kehangano lyedhina Green Climate Fund.
Ehangano ndyoka olya gandja nduno uuwanawa wu thike poomiliona N$86 koongundu dhi li 19, ndhoka tadhi longo muunamapya, iikwa niipangitho osho woo omikalo ndhoka tadhi longithwa opo ku kalekwe po oonkalamwenyo nokwa tegelelwa dhi kale dha lapa omalunduluko gothaathaaa.
Shika osha kwashilipalekwa kuminista yOmudhingoloko nOmatalelopo Pohamba Shifeta mEtiyali lyoshiwike shika mOvenduka pethimbo lyoshigongi shoka, sho a hokolola kutya omusindalandu gwopashigwana ngoka gu na elalakano lyokukwathela moku adha ehumokomeho tali kalekwa po lyi li ontega nondungethaneko yaNambia yoVision 2030, naashika otashi ka adhika uuna kwa nkondopekwa oonkambadhala dhiiponga tayi etwa kelunduluko lyonkalo yombepo osho wo ku dhikwe nkene iizemo yelunduluko yonkalo yombepo tayi ka ungaungiwa nayo.
Onkene Shifeta okwa hokolola kutya oopoloyeka ndhika tadhi kwandjangele nelunduluko lyonkalo yombepo kapu na shoka tashi dhi imbi dhi adhe elalakano lyadho, moshilongo osho wo muuyuni.
Okwa totha mo kutya oporojeka oyo tuu ndjoka oya tegelelwa okugandja omauwanawa ngaashi okwaandjaganeke omeya ngoka ge li pamuthika gokunuwa kaantu ye vulithe po500 000, nomagumbo ge li 2000 ge na iikulya ya gwana.
“Aantu ye vulithe 15000 meukililo noshowo 61 000 shaa li mewukililo otaya ka tyapula uuwanawa moprojeka ndjoka momikalo dha yooloka,” osho a hokolola ngaaka.
Okwa tsikile ko ta ti kutya ota indile noonkondo opo ehangano lyoEnvironmental Investment Fund yaNamibia lyi kale lya sa oshimpwiyu kutya aalumentu naakiintu oya kwatelwa mo ngele tashi ya pokutula opolohalama ndjoka miilonga.
Onkene okwa ti kutya omapekaapeko noshowo omasimonono gopolomalama ndjoka oyo oshipatululo sha pama kesindano lyopolohalama ndjika.