KATIMA MULILO – Babane ili limembala zalubasi luliluñwi babanyazwa mwapulao ya Lemmy Mutonga, walilimo ze 52, ili yanali mubakweli kumuetapili mwa Liluko la Misebezi ni Linzila kanako yalifu lahae, nebahanezwi kulifa masheleñi akuzekela taba yabona kwande, hane babonahalile fapila muatuli yomunyinyani David Munsu, mwakhuta ya Ngoma Lamubulo viki yefelile. Babane, Clements Sibalatani, walilimo ze 63, George Sibalatani, walilimo ze 36, Calyson Sibalatani, walilimo ze 27, ni Patrick Sibalatani, walilimoze 42, nebatamilwe Labune viki yaale kasamulaho Mutonga nakunupilwe nikubulawa, kulatelela kuzuha kwandwa yezwelela fakomano yanako yetelele, yakulwanela mubu hala mabasi amabeli. Mapokola nebaize Mutonga yana belekela mwa Windoko, naile kwasikiliti sa Zambezi kuyo tutisa likomu zahae kulizwisa kwamulaka kwa Bukalo, kuliisa kwa munzi wa Naziabo kwa Nankuntwe mwasilalanda sa Kabbe ya Mutulo, ili kone kuna nindwa yamubu nilubasi lwa Sibalatani yene isika tatululwa kale. Kunuhiwa kuli George Sibalatani kiyena yana kunupile nyandi mwapata, mi utalimana ni milatu yeñwi yakuluwa tobolo asina liñolo nikubata kupata bupaki. Babañwi babalalu batalimana nimulatu yomuñwi ni yomuñwi wakunata kamulelo wakubata kuholofaza. Bune bwabona nebaize bakaipatela muyemeli, mi taba yabona neisizwe la 20 Muyana kulumelela lipatisiso kuli lizwelepili, nikuli babanyazwa bafumane muyemeli. Muzekisi wamuuso neli Donnevan Schuter.