KEETMANSHOOP – Ngambela wanaha Saara Kuugongelwa-Amadhila ukupile bayahi banaha Namibia kuswalisana nimuuso mwakulwanisa linanga. Nafile pizo yeo Labulalu kwamukopano walitolopo kone kukubukani batu mwa Keetmanshoop. “Kumina babasanyaza taba yakuneula 2 pesenti yatuwelo yamina, mutalime sinca maikuto amina. Haiba bakwanda naha bakona kutusa muuso, kiñi luna bayahi banaha halupalelwa kueza cwalo?” nabulezi. Kuugongelwa-Amadhila nabihile hape kuli muuso ona sofumani masheleñi alikana bolule babalalu, hala masheleñi alikana bolule bamyanda iketalizoho atokwahala mwakulwanisa linanga mwanaha. “Kakuekeza nelu amuhezi mali alikana bolule ba 90 kuzwelela kwatutengo totuñwi,” natolukile mi kanako yeswana nafile buitumelo bwamuuso.
Ngambela nabulelezi bane bali kwamukopano kuli tokwahalo yatuso yalinaha sebile yetuna kufita zeli mwasibulukelo, mi nasusuelize babasakoni kuzwisa 2 pesenti kuzwisa mobakonela. Kamukwa oswana naitumezi kubao seba neuzi lico kualabela kwakupo yanaha. Kanzila yakufa piho kwabayahi ba //Kharas hala mayemo alinanga, naize balimi babasakoni kufumana tuso yalico zalimunanu mwakalulo yacwale kuli muuso hausikaba kungulela kwatuko. “Nihaikaba kuli tuwelo yamina yakweli ifitelela N$2600 yasikonkwani, mubihe taba yeo kwaofesi yaka kakusebelisa liofesi zasikiliti kuli lubone kuli lumitusa cwañi kazelusweli,” natolokile.
Naekelize kuli liluko lamezi ni mishitu neli lumelezwi kuyepa nikuzusulusa liliba zelishumi kaze ketalizoho mwasikiliti sa //Kharas. Ngambela nabihile hape kuli pulukelo yatuso yamezi ise ifilwe kwalikiliti, mi likiliti lina nikulemuha koo zeo litokwahala hahulu. Hala balimi babaketilwe naize likupo zeñwi nelikutisizwe kwalikiliti kakuli zeñwi zetokwahala nelisikafiwa, kacwalo kukalyehisa kulifa. “Likupo zene talelizwe hande seli sebezwa kuzona mi litifo likaeziwa cwanuñu,” membala wandu yamilao nasepisize balimi. Kakuba kalulo yakueza mikopano mwalitolopo mueteleli wanaha Hage Geingob nibazamaya nibona basweli kupotela balimi mwalikiliti kuyokandeka nibona hala mayemo alinanga.