Victoria Kaapanda
ONGWEDIVA-“Epangwe olya yono po onkalamwenyo yandje, osikola nda thiga po, meme a hulu ko, ngashiingeyi uumvu nowa tameke,” Megameno Titus, omukalimo gwomOngwediva osho a tameke oku hokolola onkalomwenyo ngaaka.
Titus, 34, ha zi mOngwediva Onkulu mOshitopolwa shaShana, okwati keshi we hu ku uka uuyuni, onkalo oye mu dhigupalele unene tuu konimina yina sho a hulitha.
Moonkundathana naKundana okwa popi ta ti okwa monika omukithi gosuuka nogo-TB, onkene ke na we shi ta vulu oha uhala ashike e li mombete.
Ta hokolola ta ti okwali e na oofelende omayovi, ihe ngashingeyi kape na we nando ogumwe he mu dhimbulukwa e mu etele nando omboloto. Ta ti omaliko ngoka ga li ga thigwa po kuyina manga inaa hulitha oga halakana po.
Titus okwa li a ikonda osikola momvula ye yahugunina moshiputudhilo shopombanda shuulongi shaNgwediva ngashiingeyi tashi ithanwa HifikePunye Pohamba.
Sho ta dhiladhila kutya muupyakadhi ngoka okwa gwile mo ngiini, omukiintu nguka ota hokolola ta ti megumbo lyaandjawo mOngwediva omwa li mu na oondunda dhoku hiila, moka mwa li mu na omumati ha landitha epangwe, ngoka a li e na ookuume haye ya kuye kehe ethimbo ya nyanyukilwe pamwe.
“Ethimbo ndyoka ngame okakadhona kanakatyepa, kandi na nokanona. Sho tandi zi kosikola onda li he kala nda tema lela, tandi monika nawa. Aamati ayehe konyala oya li ongame ya hala ethimbo ye ya okunwa omaluvu nokuhila omakaya nomapangwe paandjetu,” Titus ta ti ngaaka.
Ta ti sho a ka kwatwa kombepo ndjoka ondhigu, okwa tameke owala oku hokwa onkalo yawo, oshoka kehe Etitano oyo taya patitha omahala gomaninwino, ta ti onkalamwenyo ya ningi ihe ontoye nombwanawa ta ti okwa li e wete kutya nani okwa ka kala ta lilwa oshimwenyo.
Sigo a ka mona po kuume ke gomiihole posipana mpoka, ngoka ta ti e ke mu tonditha nokegumbo. Ta ti oya tameke nee taya hili nduno omapangwe gawo ya manguluka.
Titus ta hokolola ta ti yina ngoka a li omupangi moshipangelo shaShakati okwa kala nokulila omahodhi oshoka kehe esiku olya ka ninga nduno lyokunwa, osikola keyi shi we nepangwe lya ningi oshikulya she sha kehe siku.
“Onda hepeka iimaliwa noonkondo dhameme oshoka okwa kala nokukumagidha ndje kutya ngele itandi mana eilongo lyandje olye ta ka kwathelwa okamwameme tse out li atuke yaali? Okwa li handi mono ashike ta kudhile ndje nena ongame nguka kandi na naashi tandi li,” Titus ta fatulula.
Tahokolola ta ti okamwayina ngashingeyi oke na oomvula 25, ihe nako osikola oke yi thiga po konima sho yina a huluko. Ta ti oka hulile mongundu ontimugoyi nokulandula ondjila yamumwayina yokuhila omakaya nokunwa omalovu.
Aniwa kehe shoka ya li ya thigilwa kuyina kape na nando osha, ya landitha nokulanda omapangwe gawo. Ta ti iimaliwa ya li ya thigulula ita dhimbulukwa kutya oye yi longitha shike shongushu, ngele kashi shi omalovu.
Okwa li a kumagidha ta ti aanyasha naya simaneke aakuluntu yawo. Ta ti naya uve omakumagidho gaakuluntu yawo, oshoka esiku taya ka dhimbulula otashi vulika ethimbo li kale lye ya pwila po –omambo naga kale tango kwaayihe.
Ta ti omumwayinamati megumbo okwa tembuka mo ke shi mpa ha zi, omeya oga tetwa ko kape na ngu te ga futu. Ehalo lyokushuna kosikola oku li na ihe ke na oonkondo molwa uunkudi ye ishewe ke na oshimaliwa shokufuta osikola.