Tehran – Oshikondo shepangelo shiikwaveta moIran osha ti osha mangulula pakathimbo aanandholongo aakwiilongo ye vule pe-1000 omolwomukithi gwoCoronavirus, sha landula sho ya li ya pewa uusama kaatseyinawa yuuthemba womuntu yIigwanahangano.
“Shoka Iran a ninga po okukwashilipaleka uundjolowele waanandholongo nokuya pa efudho, shika oshinima oshinene okuyelekanitha niilongo yilwe, osho omupopiliko gwiikwaveta Gholamhossain Esmaili a ti ngaaka. Omukiintu Omuiran a yambukile koBritain Nazanin Zaghari-Ratcliffe, ngoka a li a mangwa po mo2016 nota longele egeelo lyoomvula ntano, oku li gumwe gwomaanandholongo 100 000 mboka ya li ya mangululwa muMaalitsa pakathimbo.
Emangululo lye olya undulilwa komeho sigo omomasiku 20 Mai, oohahende dhe osho dha lombwele oshikundaneki sho-IRNA mEtiyali ngaaka. Okangundu kaatseyinawa miinima yi na sha nuuthemba womuntu kIigwanahangano oshiwike sha za ko oka li ka pula Iran a mangulule aanandholongo pakathimbo omolwoCovid-19, mwa kwatelwa mboka ye na uukwashigwana wiilongo oohiyali. Esmaili okwa li a yamukula ta ti aatseyinawa mbaka naya gandje olopota kutya Britain naAmerica oya ninga po shike ngele tashi ya kaanandholongo yawo.
“Otwa gandja efudho kaanandholongo aakwiilongo ye vule 1000… yamwe Aamerica naaBritain,” ta lombwele iikundaneki ngaaka.
Omupopliko gwoshikondo shiikwaveta shepangelo okwa ti Iran ina pewa uusama oshoka ota longo nawa. Aanandholongo 100 000, oyendji Aairan, oya li ya egululwa mondholongo pakathimbo omwedhi gwa za ko sigo ngeno omomasiku 19 Apiilili, nefudho ndika olya li lya undulilwa komeho sigo omasiku 20 Mai.
Oshikondo shiikwaveta osha li wo sha tseyitha omwedhi gwa za ko kutya aanandholongo 10 000 otaya ka dhiminwa po.
Etokolo ndika olya ningwa onga onkambadhala yokushunitha pevi omwaalu gwaanandholongo.
Aakwiilongo ngaashi Omufrance-Iran Fariba Adelkhah nOmuiran-America omunangeshefa Siamak Namazi nahe, Mohammad Bagher Namazi okwa itaalwa kutya sigo ongashiingeyi omo ye li mokalimosho.
Omukithi gwoCoronavirus ogwa dhipaga aantu ye vule po5 200 nokukwata aantu 85 000 moIran.