TSOAXUBAMS – !Amku ǁan!khaisa ūhâs di ǁhawos ge 31 ǁanin Shack Dwellers Federation of Namibias (SDFN)din Tsoaxubams ai ǁan hâna go ama kaibahe.
Nē 1nans anin ge ǂoa ge wekheb Wunstaxs ai !ā!khōmaisa xu !hū!âsa ǀkhaeb ase ge !khō!oa, ǁnāpan ǁîn omde nî ombasense, Democratic Resettlement Community (DRC) tsî Mondesa ǁanǁguikha ǁaegu. ǁKhā tsēs ain ge nē ǁanina kai dâb ǀkha ǀnai ge khaotsoatsoa omtsoatsoas !aroma.
Johanna Nembungus, ǁîs tsîn nēpa a ǁanis ge ǁîs di dâb tsî ganganxasiba gere gowaǂui, !ā!khōmais !oagu nēti ī huib !aroma tsî ǁkhā soab ai gere mî, ǁîn ǁaninan ge ǀnai 100 omde nē !ās !nâ a ombasa.
Kaise da ge !nās ǂausib ai garu, xawe ǁkhā soab ai ra gangan, noxopan 31 khoena omde a hōbasen ǁkhās īǁkhāsib !aroma. Mâ khoe-i hoa-i di ǁkhoreb ge, ǀhonkhoesisa om-i ai ūhâbasens disa tsî da ge sida nē !nans !nâ ǀguipa ra mâǀhao nē ǁhawosa ī kais !gao”, tis ge gere ǁgui!ā.
Tsoaxubams di !ā!khōmai-aob Nehemia Saomoni, ge ge mî, ǁîn ge Harambee Omkhâisens ǀAweǁguib ǀkha a ǀguirosen hîa Namibiab ǁanǂgāsaben ai!gûsa ra aimâisa, !gōsase omkhâisens ǁgûbade.
ǁNā-amagas ge !ā!khōmais ǀawemā!nansa ra ôa-am, sida ǀhûhâsigu ǂhâsiga oe-amtsâsa, !gōsase nēsib ǁîba kaise danasa ra ǀhōǂui mâsib ommās diba,”tib ge Saomona ge mî.
“Kaise a ǂkhîǂkhîxa !khais ge, mûsa, ǁnā khoen tsî ǀaokhoen hîa nē !hūs ai omde nî ombasenn di aidi !nâ !gâiaǂgaob tsî dâba, ǁîn a !âu ǁoa ǀgūǁae omro-e hōbasensa !khais !aroma,” tib ge !ā!khōmai-aoba gere mî. ǁKhā ǁaxasib nē !hūs ǁkhaeǁnâs dis tawab gere !hoa soab aib ge Erongob ǀkharisi mûǂamaob, Neville Andreba koasa !ā!khōmais tsî SDFNs hâra ge mā, ǁîra ge !khōǁôagu tsî !Hūb di ǁûb, Hage Geingob di khoexa!nâ ǂans, khoena !amku hâ!khain īǁkhāsiba aimâibas dis ai dīǀoaǀoa !khais !aroma. “Tita ge kaise ǀgawasa SDFNs ǁanina ra ūǁnâba ǁîn di ǀguixasib sîsenni !aroma. Nē !nans ge 605 marisâus dīǀgauga 20 400 ǁanin !hūb a ǂhabase hâna !khōǂgā hâse ūhâ. SDFNs ge marina ǀhûhâsigu ǁanin hîa omna ra om ǂgaona xu ǀhaoǀhao tsî ǁîn ǁhawode ra ī ǁkhā kai,” tib ge Andreba gere mî.