Magano kuna kara mondango zodoropa zaOndangwa asi tava katulisapo noveta donompe kuhamena nongesefa mokuditjangesa ntani nononzapo ntani ruha nye rokuzerea ngesi kuna kumoneka asi kuvhura yize mosirugana.
Kampani zokuyitara ngesi nare vazipa sirugana oso vawapukurure asi ngapi omu nadirugana nongesefa ntani omu navagendesa yihando awo nare vayagava asi yinke varuganako kutunda apa vavapa sirugana sangesi.
Nghivelwa Planning Consultants ava vagava elikido simpe ngesi kuna vatamba vakalikide hena omu navatjangesa nongesefa nomagano asi ngano ngapi navagendesa yihando. Omu vana kundindira nye vakansela asi vaturemo magano gawo komeho vakayiture nayinye eyi moyirugana.
Posiruwo nye oso vaninkire elikido, mugendesikurona Nghivelwashisho Ndakunda, katente asi yina kara hepero nkenye doropa zikare nonoveta dazo edi nadivhura kuvavatera asi ngapi navagendesa sihonena kovanagensefa ntani kovatungimo.
Age katente asi vanangesefa mwankenye doropa vahepa kulitjngesa kondango zodoropa yipo varugane ngesefa kukwama ozo doropa.
Nsene asi ngesefa ozo zalitjangesa hawe ngesi rugana nye noureru morwa nkenye eyi vana hepa ndi makwaso vahepa kulikida asi valitjangesa modoropa ozo, makura veta ozo tazivagame.
Ano kukwama nye nayinye oyo, awo vahepa kufuta mutero, nampili vakare asi awo kugava yirugana kovantu modoropa yimo ana kutanta Ndakunda. Veta ezi nazikava nye vadive asi nkenye ngesefa kurugana ngapi, ntani evango lyokuhura kupi, ntani vahepa kuvasilika asi oyo kapisi yiyo vatjangesa mongesefa zawo.
Ntani nkenye ngesefa zahepa kugwana omu ava tara ruha oru azirugana kuhamena vantu noyimeno asi ngapi yina vagumu yipo asi yigave asi ngapi omu ngavakarugana. Ntani ngamukara hena ngendeseso asi nsene muna ngesefa ana hara kuturamo ehundiro ana kupira kuzuvhira mbili pangenderera.
Kugusako nye ngesefa, ndango simpe nazikakara asi vahepa kutulisapo noveta omu navadamu yihando nomuvayigendesa. Mokukwama omu navagendesa yihando, ndango zahepa kukara nevango lyokuzugumina yihando eyi, kukwama omu yafana yipo vayitware oku yawapera.
Ano evango eli lyoyihando vahepa kulidiva nawa.
Ano apa tuna kuuyunga ngesi ndango kwakara asi nkenye sihando kusizugumina pevango limwe tupu, kugusako eyi yakara asi yokutunda mosipangero.
Ano evango eli kuna kara ngesi asi kapi lyasilika asi yilye gokuvhura kuhwiliramo. Anon ye apa naziza veta ezi moyirugana, nayinye eyi nayikara asi yakapita kapi ngayihoroka hena.