Sîsenao-i xa xoahe hâ
Kaiǁkhaes
Sari-aon kurikorobe ra dīhe Kaiǁkhaes !Narisarimas tsî ǂHarugub ǁGauǂuidi dis ge ǁaupexa 20%gu ǀkha kurikorobe ra ǂharo. Kaiǁkhaes hîa !am !ās ase a ǂansas ge nē haka tsēde ge !khōǂgā hâ i ǁgauǂuis, ai!â ge ǂoa Satertaxtsēs ai ge !gûǀams tawa !gôa!gôab ai 11 749 sari-aona ge ǂgaesī hâ i. ǂOago kurib ais ge ǁîsa 9710 sari-aona ge ūhâ i.
“Sida ge mûmûsaseb !gôab ǁgauǂui-aon tsî ǀhûhâsigu sari-aon diba nē ǁgauǂuis !aroma ra ǂharo ǀgauba !kharu ge hû kurigu !nâ ǀgaisase ge mû. Ai!â ge hâ i kurigu khami ge ǁkhāti nē !nās tsîna a !gāsa !khais ge turab nē ǁgauǂuidi !nâ !âs dib ǀgaisase ǁgauǂui-aon tsî sari-aon hoana xu hâsa tsî ǁnās ǀkha !gôaba ǀgaisase ra ǂhākhâisa,” tis ge mîgowaba-aos Kaiǁkhaes !Ā!khōmais dis, Maggy Sheyasa ge mî.
ǁGauǂui-aon di !gôab ge ǂoago kurib di 105sa xu nē kurib !nâ 110 kōse ge khâi. ǁGauǂui-aon ge sao ra !kharaga !âga xu ge hâ i; ǂhanub ra mā !kharaga !oabadi !khaigu tsî ǂnûiǂgādi, mariǁhōgu, ǂans tsî ǁnâu tsî !hoaǂharugub texnoloxib, ǂhôamāǂuidi, !hanaǂgāb, sîǂkhani tsî !hae!oabadi, ǂans ǂhanub ge ǁama !garo!ādi khoena hâ!khaina mās !aroma, ǀhûhâsiba omkhâis ǁawoǁawos !oabadi, !omkurus ǁkhāǁkhākhâis !oabadi, !norasasib tsî ǁawosasib tsî ǁgau!nâs tsî ǀgapi ǁkhāǁkhākhâidi ǂnamipe hâ ǂans tsîna. Nau hâ xūn tsî !oabadi hîa ge ǂkhari tsî ǁaegub ǀnōb ǂharuguga xu hâ in ge; saran, ǁgâiǁnâsa !kharaga xūn tsî ai-īsi!khōǁnâdi, sēna kurus, ǂnuwiǁkhāsib ǁgauǂuidi tsî !omn ǀkha kurusa xūn, ǂurusib tsî îxasib !oabadi, ǀhuru-ūxūna ǀgôan !aroma tsî !gâi!gâisen tsî ǂkhīǂkhorisens !âgu tsîna.
“Sida ge ǁgauǂui-aona Namibiab a ǂhabase ge ūhâ i tsî sao ra !hūgu tsîna xu; Zimbabweb, Suid-Afrikab tsî Keniab hâga xu,” tis ge Sheyasa ge mî. Kaiǁkhaes !Narisarimas tsî ǂHarugub ǁGauǂuidi ge hoaǁae ra ǁgū !oabadi ǁgauǂui-aon tsî ǀhûhâsigu nî māhede !gâi!gâi!nâsa ǂgaoǀkhāsa !harib ai hâ !oabade ǁawoǁawos !aroma. ǁGauǂui-aon ge !kharaga !âgu !nâ ge ǀgoraǂgāsa i ǂuru tsî ǀgau ra ǀnûguden nî ūhâse ǀhûhâsib khoen tsî sari-aonan ǂkhîǂkhîsa tsî ǀgapi !harodi ai hâ !oabade nî māse ǂgaoǂgao!nâ nis ase. Standard Banks, Nedbanks, Gloswa Biltongs tsî Tungeni Afrikas hâdi ge nē ǁgauǂuisa marisise ge mâ!gâ hâ i. Sao ra ǁgauǂuis ge !Khaitsâb di 4sa xu 7s kōse a ǀaweǁguisa 2016 !aroma.