OSHAKATI- Ongudu yovadali oya li yaongala Etitano ikundafane nghee ina oku xulifapo omadipayo oshoyo omadipaafano mokati kounona novanyasha.
Omukwateli komesho woshihongi Selma Nangolo okwa ti vahapu vomuvo kave na oyuuyemo, ashike oku kala omutumba momaumbo vamwena, voo vehe na kutya otava ningi shike kashina eshi tashi kwafa, omanga ovena ovana tava fi oipundjamenye.
“Shaashi onghendabala oidule oku mwena, otwa ongala nena apa opo tu li nyike komilungu navakwetu fye tu kundafane nghee tuna okushi ende opo tu mone lela oshietifi shomafyo omalimangeleko, oshoyo omalidipayo omikalo dayooloka eli hanena oshiwana unene tuu movanyasha nounona, shee tumone kutya oupyakadi ouli peni lela, nonghee tuna okuu kandula po,”Nangolo ta ti.
Okwa ti ovahala ngeno oku longelela kumwe nouministeli woukashike kookanhu oshoyo ouministeli wehongo ngeno vati tava ende tava talele po eefikola nokukumaida ovanafikola oshoyo oku vatwa omukumo ounona, ngeno tave shi ningi mekwatelo komesho lopolifi. “Eshi shitilifa unene osheshi
shokaana keedula 12 taka kufa ongodi ndele take ili tula mofingo noku li dipaa ndele kakena ashike nande oo oumbada washa. Ounona vahapu komaumbo pame ihava pewa hole yawana pamwe, ile oshike…,” Nangolo ta ti.
Umwe womovadali Grace Epafras okwa ti ovahala okufila oshisho ovakwashiwana vaNamibia, kutya nee ovava veli moluhepo londjala ile tava mono oixuna komadiladilo opo vadule oku vakwafa apa tava dulu.
“Otwa hala yoo oku eta eudafano nombili moshiwana pokati kounona novadali. Otwa hala Namibia li kale lombili noukaume ndele haNamibia letiko lohonde,” Epafras ta ti.