Hango Salom weedula 31, hamushanga pofikola Leinge Private School okwe lifutila mo modolongo noshimaliwa shoN$1 000 konima eshi kwa li a kwatwa po shaashi vati a ndjondjela omunafikola omapulo nomanyamukulo omakonakono.
Salom okwa holoka momhangu yaOutapi onghela noshibofa shaye osha undulilwa komafiku 26 Febuluali 2024.
Oshiningwanima osha ningwa mOkalongo moshitukulwa shaMusati oshivike sha dja ko.
Omunafikola oku na omido 17 noku li mondodo onhimuwoi kofikola Oneheke Combined School.
Omapopyo inaa kolekwa otaa ti ava ove na ekwatafano lopaihole.
Omukulunhu koshikondo shokukonakona oimbuluma shopolifi mOmusati, omupedu Commissioner Moses Simaho okwa hokolola ta ti omunafikola okwa li naye a kwatwa po nokonima okwa ka mangululwa shaashi oku na omido di li koshi yeedula 18.
Otaku hokololwa kutya omulumenhu ou okwa kufa omapulo nomanyamukulo ndele te a yandje komunafikola opo e ke lihonge noupu oinima aishe tai pulwa mekonakono.
Opolifi oya hokolola tai ti omukulunhufikola pofikola hapa fikola omunafikola ou okwa lopotelwa kombinga yomunafikola e na omapulo nomanyamukulo oshilongwa osho ve na okushanga mefiku la landula ko.
Okudja opo okakadona oko oka ningilwa omapulapulo nokonima oka popya kutya omapulo oke oke a pewa kuhamashanga kofikola oko.
Eshi a kwatafana naKundana omukulunhuwiliki mouministeli wehongo, Sanet Steenkamp okwa ti omunhu keshe ta ndjondjele ovanafikola omapulo nomanyamukulo na lopotwe opo a kale a kwatwa po shaashi ota longo oshimbuluma.
“Osha nyika oshiponga ngeenge ovahongifikola ile ovanailonga keefikola tava yandje omapulo kovanafikola molwaashi otashi dulu okueta omunhu a kanife oilonga.
Onghee oshi li oshimbuluma shakula,” ta ti. Steenkamp okwa ti ovakulunhufikola nava kwashipaleke kutya omakonakono nomapulo oku li mefiloshisho pehe na omunhu ta dulu okuyandja kovanafikola.
“Ovahongifikola noohamushanga peefikola nava fimaneke oilonga yavo. Ovanhu nava xulife po okulonga oulingilingi keefikola,” ta ti.