OUTAPI – Ovapolifi moshitukulwa shaMusati ova li ve na oshiongi shopambelwa, shi na sha nopatolola yaDesemba yokumena omaliko ovanhu moshitukulwa.
Omukulunhu wopolifi moshitukulwa Ismael Basson okwa ti opatolola yavo yomoshitukulwa oya tameka kuyele opo va dule okukondolola oimbuluma nomalinyengo ovanhu manga pepi.
Okwa ti opatolola oya teelelika i ka kale ko keshe efiku, novapolifi otava ka kala pomainda aeshe eendjila moshitukulwa.
Ovapolifi vamwe yoo ova teelelika va kale tava ende needoolopa adishe, tava potolola mokuhada eetuwa, ovatwaalelwa novashingi voihauto.
Pefimbo leengundafana Basson okwa kunghilila ovapolifi ve lihumbatele ovakwashiwana nawa, opo ashike tava dulu okulonga nawa novanhu.
Okwa twikila kutya opotolola ei ya tameka Eitano vati ita popi kutya itai ka xula naini, fiyo ovakwashiwana va hafela eshi ovapolifi tava longo.
“Onda hala keshe omupolifi ta ka longa nomukwashiwana e lihumbate nawa. Keshe omunambelewa okwa teelelika a kale e li popya kedina kutya oye lyelye, nomolwashike ta hade otuwa yomunhu oo,” Basson ta ti.
Okwa ti kape na omupolifi e na oufemba ile a teelika a ka lulumike omunhu kolutu shaashi otashi ka talika ko onga oshikulumuna, nomufekelwa otaka patululilwa oshibofa.
Okwa twikwila kutya ovapolifi inava teelelwa va ka longife eenghono da pitilila papuko.
“Ovanhu navalongwe navo nombili ashike ngeenge omunhu ota ningi omanganga, eenghono deni nadi hapupale. Ngeenge omunhu okwa tameke okuumba oshilwifo, nanye yasheni, ashike inandi tya dipayeni. Ovanhu nava yashwe komaulu shaashi fyee otwe va hala ve na omwenyo,” Basson ta ti.
Okwa ti, ovakwashiwana kave na oufemba wokuulika ovanambelewa eendjebo, nande vati ondjebo yoshidanaukifo. Ngeenge vati oshiningwanima sholudi eli osha ningwa, nakuulika ondjebo ote ke liyashifa yeevene shaashi vati ovapolifi ihava dana neendjebo.