Efraim Nekongo wevava lovanyasha voSwapo (SPYL) okwa lombwela hamushangandjayi Sophia Shaningwa nomupedupresidente woSwapo Netumbo Nandi-Ndaitwah kutya ovanyasha navo ova hala okuninga eeminista noshoyo oilyo yomutumba wopashiwana.
Edi Nekongo okwe di popya komutumba woSPYL wa liko shivike sha djako mOngwediva.
Elalakano lomutumba okukundafana omashongo a kuma ovanyasha moshilongo noshoyo omashongo a taalelwa koshiwana ngaashi omhumbwe yomeva longhalo lokuhe na oilonga.
Nekongo okwa pula hashanga-ndjayi woSwapo opo a yandje omhito kovanyasha va ninge ovaleli
vopombada va yooloka.
“Nafye ohatu dulu okuninga eeminista noilyo yomutumba wopashiwana. Onghee ohatu kala tu udite etumba nehafo ngeenge twa pewa omhito yokulela,” Nekongo ta ti.
Okwa ti ovanyasha ovo ovaleli vokomongula onghee osha fimana ngeenge tava pewa omhito yokulela opo va hambule po oshilongo.
Lwopokati opo, Nekongo popya yoo vali kombinga yomhumbwe yokuhe na omeva ili tai dana onghandangala ya kula moshiwana unene tuu moshitukulwa shaShikoto noHangwena.
“Natu longeleni kumwe okukondjifa enota monooli shaashi omeva okwa fimana efimbo keshe kovanhu noimuna,” ta ti.
Moshipopiwa shaye, hamushanga-ndjayi woSwapo Shaningwa okwa ti ovanyasha ovo ovaleli vokomongula koikondo ya yooloka.
“Ovanyasha ovo tava ka kufa po eemhito detu doilonga ngeenge otwai mopendjela. Onghee osha fimana opo tu xwaxwameke ovanyasha nokuulika oshihopaenenwa shiwa,” ta ti.
Shaningwa okwa yelifa ta ti otashi pula omunyasha ha longo noudinini opo a ninge omuleli onghee okwa ti heeno ovanyasha otava dulu okuninga ovaleli shaashi ohava longo nelitulemo.