Oshitukulwa shaHangwena, Oshikoto oshoyo Oshana, oya ninga efiku tai nane noudjuu molwopyakadi womeva a ninga efimbo lile a pata.
Eedoolopa ngaashi Oshakati, Ongwediva, Ondangwa, Helao Nafidi, Eenhana oshoyo Omuthiya oda kala nokutaalela omhumbwe yomeva okudja mo24 Kotoba 2023.
Eshi vati osha etifwa koilonga yokuwapaleka okanaala kOmahenene-Olushandja, oko haka fikifa omeva moitukulwa.
Mayola wodoolopa yaNgwediva Taara Shalyefu okwa ti kutya odoolopa oi na oiputudilo ihapu modoolopa, mwa kwatelwa eefikola da fika po23, noya taalela eshongo molwokuhe na omeva.
“Eshi otashi lihongifa ounona noudjuu, unene tuu ava ve li momihandjo shaashi kave na apa tava hange omeva. Ohatu kendabala nee okushiivifila ovakwashiwana omutengenekwafimbo womeva taa ka patuluka, opo va dule okuteka, ashike hasho naana ekandulepo dingi loupyakadi, shaashi ou e li tu omeva a patuluka, oye omunelao,” Shalyefu ta ti.
Okwa twikila yoo kutya odoolopa natango oi na oukilinika noshipangelo shakula shaMedi Park, oyo ihe fi okukala ihe na omeva. Omupopiliko wodoolopa yaShakati Katarina Kamari okwa ti Ovashakati ova ninga efimbo li le vehena omeva, unene tuu vati ava va ama ombinga yaShakati West.
“Ohatu kendabala nee apa hatu dulu okuyandja omeva, unene tuu koipudilo ngaashi eefikola, oipangelo oshoyo omangeshefelo. Ashike nande ongaho natango peenghatu dihapu ohatu li hange hatu nane noudjuu shaashi oiputdilo oihapu, voo ovanhu itava wanene omeva aa eli po,” Kamari ta ti. Okwa twikila kutya ota kunghilile ovashakati alushe vakale vena omandini atekelwa, voo vadule oku longifa omeva aa vatu vikila ngeenge omeva apate.
Okwa ti yoo okwe li neekela kutya oupyakadi womeva otau kandulwapo diva, opo ovanhu vashune konghalo yavo yoku hafaya enota.
Omupopiliko wodoolopa yaShikoto Otilie Shingenge okwa tumbula kutya ovanhu vomushitukulwa shaShikoto navo otava li tava pi. “Ava vamona ekwafo lomeva ovava ashike veli moipangelo, oshoyo eefikola. Ovakwashiwana aveshe vati ovena oku konga omikalo nghee vena okuli xupifa voo vene,” Shingenge ta ti.
Okwati ovahala onghalo ishune koluwa shaashi ovanhu otava mono oixuna kenota.
Omukulunhu waNamwater Hieronymus Goraseb okwa ti ove li opyakidila nokupangela okanala keli kOmahenene fiyo Olushandja opo vadule okuli longekidila omeva o muDesemba fiyo oJanuali oo tama kakala eli omhumbwe yakula.
“Eshi osha etifa Namwater akale ena etondoko lomeva aninipala okufikifia keedolopa,” Goraseb ta ti.
Okwa ti yoo oupyakadi owa teelelika ukale wakandukapo mo07 Novemba 2023.