OUTAPI – Ovanafikola mondodo 8 fiyo 10 meefikola dihapu moshilongo ova teelelika va tameke omakonakono moshivike tashi ya.
Umwe womovakulunhufikola veefikola di li pokutameka omakonakono, Erastus Shikongo, wopofikola yopaumwene yo-DAPP okwa ti, yee opamwe novahongi vaye ove lipaka mo mokulongekidila ounona omakonakono okexulilo lodula.
Okwa ti fiyo opapa omalongekido otaa ende nawa lela shaashi vati ova tula po omikalo dihapu dokulihongifa ounona omanga inava ya momakonakono.
“Ofikola yetu oya idilila ounona vomodoolopa oshoyo vokoushai. Haaveshe ve na oikwa noipangifo yokulihongela komaumbo, onghee otwe ya po nomukalo woku va pa efimbo lokulesha omutenya hali ningwa konima ngeenge va dimbuka meetundi,” Shikongo ta tumbula.
Okwa twikila kutya ovahongi alushe ove lipyakidila nokweendululila ounona apa tava nyengwa.
Okwa twikila kutya vamwe nokuli ohava tula po omalandulafano eepologalama, opo va dule okushakenifa ovanafikola momalomakaya ve uye va endifwe po apa vehe udite, voo tava ningilwa oukonakono vokulilongekidila aa makula.
Shikongo okwa ti vamwe vomovanafikola vavo ava hava di meedoolopa ohava hiila eenduda shaashi omaumbo avo e li komakule.
Ovanafikola ava ohava dulu okukala oihakanwa yomashongo mahapu a puka ngaashi okutokelwa meendingosho, okunwa omalodu naikwao aishe ya ngabekelwa ounona ve li koshi yeedula 18.
Okwa ti vahapu ohava di kuvo vene ashike eenduda davo odi li mokati keenhele domanwino.
“Ounona ava vahapu ohava kala va ninga oihakwanwa yakakombo ilifa kadi lialula shaashi kave na omudali e li po ta kumaida yee ta wilike, ovanhu ove li ashike kuvo vene,” Shikongo ta ti.
Okwa ti yoo kutya nonande pe na omashongo e li ngaho, vahapu ohava kendabala lela okuwanifa po eshi she va kufa komaumbo, nokexulilo lodula ohava di mo noitwa i etifa eenghono.