OSHAKATI – Omunafikola weedula 20 vati okwa li a kwatwa po ombabyona kovalumenhu vatatu noku mu fininika opo a dengele ovakwapata vaye ve mu tumine oshimaliwa.
Kakele kokufininika ovadali va tume oshimaliwa, ovalumenhu ava vati ova denga okakadona oko noku ka nyeka ongodi yako yopeke.
Oshiningwanima eshi osha ningwa Omaandaxa molukanda Omahenene mOshakati efimbo lokomatango.
Nakuninga oshihakanwa omunafikola koshiputudilo shaUNAM mOshakati.
Opolifi oya hokolola tai ti omukainhu ou okwa lefa otaksi a uka kOngwediva, ashike manga ve li mondjila ovalumenhu vatatu ovo va li motuwa ove mu pilukila po, tave mu pula oshimaliwa, tava ti ngeenge ke na sha otave ke mu landifa po koAngola.
Otaku hokololwa kutya ovalumenhu ava ova pula nakuninga oshihakanwa opo a dengele ovadali vaye te va lombwele kutya okwa kwatwa po ombabyona onghee nava tume oshimaliwa opo a mangululwe.
Okudja opo ovakulunhu vaye ova tuma N$3 900 molwaashi vati okwa li va tila okaana kavo ka ka landifwe po.
Konima yokafimbo ovafekelwa ova pula omunafikola opo a kufe ko oshimaliwa osho kwa li shi li komavalulilo ombaanga yaye shoN$780 noku shi tumina ovafekelwa.
Oshimaliwa ashishe kumwe sha pewa ookalyamupombo oshi fike N$4 680.
Okudja opo ovafekelwa ova faduka po nokufiya omunafikola ou molukanda mokati keebashu.
Oshiningwanima shikwao, omunafikola weedula 21 okwa tulwa mokatoo nokukufwa oN$38 300 kovalumenhu vavali.
Oshiningwanima osha ningilwa mOhangwena pendiki lomangeshefelo efimbo lomutenya Etivali.
Omupopiliko wopolifi moshitukulwa shaHangwena Sisande Andreas Nghiyolwa okwa hokolola ta ti omukainhu ou okwa ufanwa kovafekelwa opo e ke va tolokele shaashi ope na umwe iha udu ko Oshingilisha.
Otaku hokololwa kutya ovalumenhu ava okwa li pe na umwe ta landifa okawe kumukwao ashike kave uditafane.
Okudja opo omukainhu ou okwa pulwa opo a tolokele omufekelwa umwe.
Opolifi oya ti okudja opo omunafikola okwa pulwa opo a fiye po ondjato yaye omo kwa li mu na oshimaliwa, onghee ova ya keshina lombaanga opo a ka pewe oshimaliwa sholupandu eshi a toloka.
Nakuninga oshihakanwa eshi va aluka ova hanga nale omulumenhu ou kwa li a fiilwa ondjato a faduka po.
Kape na ouyelele kombinga yovafekelwa aveshe nomakonakono opolifi otaa twikile.
Omwedi wa dja ko, omunafikola womukainhu weedula 25 naye okwa li a kwatwa po ombabyona nokunyekwa oshimaliwa N$5 000 nongodi yopeke kovalumenhu vatatu e va hanga motaksi.
Oshiningwanima okwa li sha ningilwa komukunda Omayanga moshikandjohoololo shaKatana efimbo lokomatango.
Otaku hokololwa kutya omukainhu ou okwa ningilwa omatilifo edipao nekwatonghonga onghee naye okwa li a lombwelwa kovafekelwa opo a pule ovadali vaye oshimaliwa ndele tava tumu.