Omulumenhu weedula 20 okwa fya konima eshi vati a tuwa nombele kumumwainamati pefimbo kwa li tava tanguna keendingosho.
Oshingwanima osha ningwa mexuliloshivike komukunda Omhumbu moshikandjahoololo Etayi, moshitukulwa shaMusati efimbo loufiku.
Nakufya okwa tongolwa oye Joseph Nangolo omukalimo womukunda Omhumbu.
Omukulunhu koshikondo shokukonakona oimbuluma wopolifi moshitukulwa shaMusati, omupedu Commissioner Moses Simaho okwa hokolola ta ti Nangolo okwa li tava tanguna nomufekelwa nokutwa eemhata kombinga yokuhola oukadona.
Ota ku hokololwa kutya omufekelwa okwa ka tameka a handuka naaahi sha eta a kufe ombele.
Okudja opo omufekelwa okwa kufa mo ombele yokapi nokutwa Nangolo lwoikando ivali monhulo.
Nangolo okwa xulifila ponhele opo nokonima omufekelwa okwa faduka po auka moixwa.
Opolifi melongelokumwe noshiwana oya ninga eenghendabala dokukonga omufekelwa fiyo ta kwatwa po.
Omufekelwa ota holoka momhangu yamengestalata mOutapi nena, nota pangulilwa oshibofa shedipawo.
Opolifi onghee nga tai twikile nokukumaida oshiwana opo shi xulife po okuumbata oilwifo ngeenge tashi tanguna unene tuu ngeenge omunhu e li keendingosho.
fhamalwa@nepc.com.na