OKONGO-Kansela woshikandjohoololo shaKongo Efraim Shipindo ota ti oikunino younamapya otai twikile nokuya komesho noshoyo okuetela ovanhu omauwa ngaashi eemhito doilonga nomangeshefelo.
Shipindo okwa ti moshikandjohoololo shaKongo omuna oikunino younamapya i li 34 ha mu kunwa okunonwa ya yooloka.
Onghee okwa kumaida ovanyasha opo va twikile okukufa ombinga moinyangadalwa younamapya nelalakano lokulwifa ondjala noluhepo.
Okwa weda po ta ti oshikandjohoololo shaKongo osho shimwe shina oikunimo younamapya ihapu moshitukulwa shaHangwena.
Oshivike sha djako Kundana okwa talela po oikunino ya yooloka mOkongo noshiwana sha mona eemhito doilonga osha hokolola tashi ti osha pandula eshi sha mona doilonga.
Ovanangeshefa va yooloka mOkongo ohava ka landa eenyanga, omatama nosho tuu oikunomwa ya yooloka vo va dule okulandifa momatala nomomapandaanda.
Bonifatius Nghituwashimwe ha longo moshikunino Enyana shi li momukunda Enyanya okwa hokolola ta ti ka pena oshilonga shiwa sha fa okulonga moshikunino molwashi efiku keshe ohe li hongo oinima ipe nghee e na okulonga nomikifi doimeno.
“Moshikunino omu onda mona mo ounongo noshoyo owino yokulonga noimeno ya yooloka konima eshi da pewa omadeulo komuhona wange,” Nghituwashimwe ta hokolola.
Okwa ti pefimbo kwa li ehe na oilonga okwa li ta xupu noudjuu okuyambidida ounona vaye ashike paife oha mono oshimaliwa nokudula okuyambidida ofamili yaye.
Nghituwashimwe okwa kumaida ovanyasha vakwao opo va kale tava ka konga oilonga moikunino shaashi otava mono ko ounongo opo navo va dule okutotapo oikunino yavo vene.
Abraham Hamukwaya mwene woshikunino Enyana okwa ti okwa kuta ovanhu vahamhano moshikunino shaye hava longo efiku keshe.
Okwa ti okwa tota po oshikunino opo a dule okulonga oikulya noshoyo okuyandja eemhito doilonga.
“Osha fimana ngeenge Ovanamibia hatu longo oikulya yetu vene. Ounamapya owa fimana molwashi tau hambula po eliko loshilongo tashi pitile momangeshefelo.