Simon Petrus
ONGWEDIVA – Omido heyali da pita po, Simon Petrus okwa ile omukungu nomeva komalungula, neengodi oda li tadi loko okudilila mounyuni aushe eshi a eta po ongodi oyo hai dengwa nopehe na omhumbwe yokakalata ile efimbo lokongodi.
Okudja nghee a holokele meenghundana, inapa udika sha vali naanaa shi na sha nomunafikola ou wokosekundofikola Dr. Abraham Iyambo kwa li.
Petrus mboli osho e shi pondola okutwikila nelihongo laye, noshivike sha dja ka okwa mona onghatu yodiploma yoingeneering.
Okwa lombwela Kundana nghee eshi enda opo a mone eifano mounongononi tali ifanwa electronic and electrical engineering koWindhoek VTC.
Petrus okwa ti eshi she mu undula a ka ninge ouinginiya u na sha nomalusheno osheshi nghee a dja okwa kala e hole okudanena oinima ya nyika omalusheno nande a dja he i dengelwa.
Okwa twikila kutya oufifiti waye okwa pula nao komesho nokwe ke lihaluka a pangela ongodi yokudenga ihai longo nokakalata.
Okwa ti ongodi oye lihanena omalungula oshoyo ounyuni osho sha etifa a shiivike kuvahapu.
“Shaashi ame nghi shi omunamaano lela mofikola, onde ke lihaluka nda dopa ondodo onhi-12.
Konima eshi nda dopa, onda ka mona omhito ndi ke lihonge koshipudutudilo shopombada sha-VTC, omo nde ke lihaluka Sam Nuyoma Foundation oshoyo Erongo Mine tava futile nge konima eshi va mona oilonga ei handi longo,” Petrus ta ti.
Okwa twikila kutya olweendonghalamwenyo laye koshiputudilo okwa kala e lipyakidila neepoloyeka dihapu dokueta po oinima yayooloka. Okwa ti tete okwa eta po ohauto oyo ya li hai tondoka ngeenge ya tyaatyelwa.
Okwa ti ohauto oyo ohai dulu ashike okuhumbata ovanhu vavali poshikando yoo tai tondoka onhapo yeekilometa 30 ile 60 kovili.
Vati ohai dulu yoo okutondoka oshinano sheekilometa 20 fiyo 30 inai tyaatyelwa.
Petrus okwa lombwela Kundana kutya otuwa yaye ohe i tyaatyele kosola oule wefiku alishe opo i dule okuyada.
Okwa ti otuwa ei a longa ye mwene ihai dulu okutondoka mefululu, onghee ngeenge ta i kodoloopa ohe i londeke meetuwa dakula deebaki, voo vati ngeenge va fiki kodoolopa yee te i kufa mo opo a dule okushinga.
“Eshi oshali sha ningila onghalamwenyo yange ipu shaashi ihandi longifa oimaliwa ihapu kwa li ngeenge tashi ya peelefa.
Onda ka dengwa ashike pomutima eshi otuwa yange ya ka hauka po ashike nande onghaho ohandi pula komesho opo ndi dule okueta po shimwe vali shiwa,” ta tumbula.
Petrus okwa ti yoo natango okwa kendabala okutula omashina kumwe fiyo ta tulile ina olusheno meumbo olo hali longifwa fiyo onena. Pokati opo natango vati okwa kendabalele ngaho okuninga edakadaka laye mwene olo ina ka pondola
Okwa ti edakadaka laye vati ola kala ashike hali tuka la yuka mombada nopedu ashike ihali dulu okuya komesho ile konima.
“Onda ka papala ashike efiku limwe nde li londa ndele ponhele yokukanghama, ola li ashike tali tuka la yuka pombada fiyo handi umo,” Petrus ta ti. Okwa ti yoo natango okwe lipyakidila neepoloyeka di na sha nomalusheno.
Okwa hala yoo okutwa aveshe ava ve na omadiladilo okulonga mo omaifano avo vaha sholole ndele va twikile fiyo tava hange efindano. taimihaihambo2000@gmail.com