Omunafikola weedula 19 ota ningilwa omakonakono opaunamiti konima eshi a pulumuna okaana ndele vati te ka dipaa noku ka fudika konima yonduda meumbo lavo.
Oshiningwanima osha ningwa momukunda Akoonde moshitukulwa shaShikoto oshivike sha dja ko.
Omupopiliko wopolifi moshitukulwa shaShikoto Inspekta Ellen Nehale okwa hokolola ta ti omunafikola oku li momake opolifi moshipangelo.
Opolifi oya hokolola tai ti oshiningwanima eshi osha monika mo konima ovadali vomufekelwa va didilika ehe na vali eteelelo ashike kap na okaana.
Onghee vati okudja opo omunafikola okwa ningilwa omapulaapolo fiyo ta yandje ouyelele kutya okaana okwe ka fudika.
Neudo okwa lopotwa oibofa itatu yovanafikola va dipaa ounona vavo noku va kupulashi konima yokupulumuna.
Omuxungimwenyo ha longo nomadiladilo ovanhu mouninsteli welongo Ayesha Wentworth okwa ti ouministeli wehongo ohau yandje omayakulo exungomwenyo melongelokumwe nouministeli woukashikekookanhu, onghalonawa yokaana, noshoyo okuyambidida okaana komunafikola ngeenge itaka dulu okuyambidida okaana kako.
Okwa ti ouministeli ou na opolongalama hai yambidida ovanafikola ve li moluhepo ngaashi oipumbiwa yofikola ile ngeenge omunafikola a mona okaana ndele okwa taalela omashongo okuyambidida okaana unene tuu ngeenge okaana ke likalwa kuxe.
“Konima ngeenge omunafikola a mona okaana ndele okwa li a lopotwa a hala okukupulashi okaana kaye ile a kwatwa komhepo yokukufa mo eteelelo oha tu kwatafana lnvahongifikola voshilongwa oLife Skills keefikola opo va kale tava ungaunga nomunafikola oo,” ta ti.
Okwa weda po ta ti ouministeli wehongo ohau kwashipaleke kutya omunafikola keshe e na oupyakadi ita shindwa kovanafikola vakwao opo a kale a manguluka ngeenge e li mofikola nokukelela aha dje mo mofikola.
Eshi a kwatafana naKundana, omuxungimwenyo mouninsteli woukashikekookanhu nonghalonawa yokaana Selma Shilongo okwa kumaida ovanafikola opo va kale tava twala ounona vavo koipangelo ngeenge tava hepekwa koupyakadi wopamadilaadilo.
Okwa ti ovanafikola nava ka konge omakwafo koipangelo ile keembelewa douministeli woukashikekookanhu shaashi oku ekelashi okaana kaku shi ekandulepo lomukundu.
Shilongo okwa yelifa ta ti ovanafikola vamwe ohava kala va kwatwa koshinyenu unene tuu ngeenge xe wokaana ihayambidida okaana kaye ile ngeenge eteelelo le likalwa komulumenhu omanga vamwe ohava kala tave lipula kutya olyelye ta kala nokaana kaye. Onghee naashi ohashi eta opo ina yokaana a kale a kwatwa komhepo yokukupulashi okaana kaye shaashi oha kala a lulilwa konghalo.