ONDANGWA – Oradio yOshipi FM, Etine lyoshiwike shika oya li yu uhala ya mwena okuza uusiku wEtitatu sho aanilonga yoradio ya li ya tula mo ekanka lyopambili onguukwanankali molwomuniilonga pamwe nayo Gustav Sheehama ngoka a tidhwa miilonga pwaa na etompelo.
Aaniilonga ayehe oya li ya pula egweedhelo lyoondjambi pambaapila, ihe Sheehama oye ashike a li mono ombaapila yelaleko lyomiilonga. Aaniilonga okwa li ya ndjike oonyala mevi kutya itaya tsikile okulonga omanga inaaya mona etompelo kutya oshike omuniilonga pamwe nayo a lalekwa miilonga. “Onda li nda pula kutya otandi tidhilwa shike, ihe sigo onena inandi mona eyamukulo. Omanga inaandi yamukulwa onda kala nokutsikila okwiilopota kiilonga,” Sheehama ta hokolola ngaaka.
Ta ti, ongula yEtine sho a li a thiki piilonga okwa li a keelelwa miilonga kaapolisi kutya itayi mo, shoka sha li sha geyitha wo aaniilonga pamwe naye. Ta gwedha po ta ti, ota kala ta yi kiilonga sigo a pewa etompelo.
“Oshike ongame awike ndi na okukala nda lalekwa miilonga, onda ninga shike inaashi ningwa kuyakwetu,” ta pula ngaaka.
Aaniilonga pamwe naye oya ti, shika kashi shi oshikando sho tango omukuluntu goradio Martin Shipanga ta tidha aaniilonga ye pwaa na etompelo.
Taya ti paife aaniilonga ye li 11 ya tidhwa ashike inaya pewa omatompelo.
“Otwa loloka onkene nena out na okwiimanga ukumwe wanankali opo tu thikame nomuniilonga pamwe natse, oshoka out na uutile kutya tashi ka holoka woo kutse esiku limwe,” ta ya nyenyeta ngaaka.
Taya ti, omanga inaaya pewa etompelo lyokutidhitha Sheehama, nayo itaya shuna mo miilonga.
Mwene gworadio yoShipi FM Shipanga okwa ti ke na nando ontseyo yasha kombinga yekanka, ye oku li kofaalama.
vkaapanda@nepc.com.na
“Sheehama ina tidhwa, ihe okwa kuthwa miilonga ongomukalo goku teta oshimaliwa, ihe kashi shi sho ya pula ya gwedhelwe,” ta popi pangondhi ngaaka. vkaapanda@nepc.com.na