ν Kae Maṱunḓu-Tjiparuro
“Indjee tu kotore ombango nokuṱizira ovanatje pozonganda. Atu ha kawondja osumara.”
Ombara Turimuro Hoveka wOuhonapare wOmbazu wa Hoveka kehi yotjiwaṋa tja Tjimana ma tja. Na weza kutja ohepero ovanene pozonganda okukara nomazuvasaneno orondu ngunda ouye amau nangarasi oumba mbwa tjitirwe yari ponganda yoharive ndjo, otjiraisiro tjokutja ongaro indji wina ya heza okuza kovanene mba isa ovanatje ovaṱiṱi mbe ri kehi yozombura “okuvesa nao”.
Omambo nga we ye hungirire kombanda yonḓengura ndja nyosire okuti nai ingana mokati kotjiwaṋa, muyo mu mu nondatumisire yokanatje ape kozombura ine. Eye ma tja oumba mbwi wa vasere katjisupi komatwi we ngunda ee hi ya tarere indji onḓengura, oyo nai ndja inganisa otjiwaṋa nehi arihe. Tjarwe wina kuye otja tji ma tara mu indjo onḓengura yokanatje okeni ku make rihepura kutja kawire kopasenge, ovito mbi ke navyo kavi nokuyarisa nao. Me ripura kutja tjii hapo omaumba ya ri pekepeke poo ndee? Opu ma munu ohepero wokutja oumba imbwi u tarewe ourekoto. Ma tja omazuvira omatenga yari pokutja ounatje ouṱiṱi kemwe okanene kozombura hambondatu ku ka harere okuundurira okakwao momuriro posi ya imba eye nai mbyee ku zuva nokumuna kambi ri vyo.
“Nandaku ma vyungurwa nawa atja tu kongorera. Ngatu kongorere popezu uriri tu tare kokutja porumwe pa kawondja otjikwaye kutja atji ha yaruka po rukwao,” Hoveka ma tja. Komurungu wa raisa kokutja otjiṋa otjivi kaparukaze tji mo tara mokanatje okeni, poo ovakwate nu nandarire ingwi ina omuini tji ma tara muko omuano mbu kanyanyauka na mbu ka pata omeho. “Tji mo tara uriri ozombara zokandu ku ke ṱa mbo zeri motjipara, aye mape yandja okaperendero momutima ku ke hi nokupwa,” Hoveka ma tja.
Ma tja ondimwa ovanene okuiisa ovanatje aveyerike na zeri kutja atja rira nawa nomazuvasaneno ovanene tji mave za po ponganda aha ire tjimwe avehe nungwari pe sewe umwe pu novanatje. Kutja okukatjorora, okonḓiro poo okomukandi.
Mena rokutja ovanatje oviṋa mbi ovivi mbi ve tjita ovyombi mbi ve tarera moviṋa vyouye wakandino ndi tjimuna ozongoze ovanene ave he ri po.
Okuhorera nokutara kutja imbi mbi ve muna momambo poo indee?