WINDHOEK – Omepresidende Hage Geingob okwa ti oshikondo shoikwamina osha fimana shaashi otashi yambula po eliko loshilongo noshoyo okweeta po eemhito doilonga.
Okwa ti ovanhu ohava hupu meedjo doushitwe onghee osha fimana opo oshiwana shi kwatele po nokulongifa eedjo doushitwe nawa.
Edi Geingob okwe di popya pefimbo a li ta patulula pambelewa omutumba noshoyo omaulikilo oipindi oikwamina moWindhoek Etitatu.
Okwa ti eedjo doushitwe ohadi longifwa pamikalo da yooloka noshoyo okulongwa oinima ya pumbiwa okulongifwa mokukalamwenyo kovanhu kwakeshe efiku.
Okwa weda ta ti eedjo doushitwe noikwamina otadi dana onghandangala yakula menenedu laAfrica tashi pitile mokulandifa oilongonwa ya dja meedjo doushitwe.
“Eemina needjo doushitwe otadi nane ovanhu va yooloka okudja kondje yoshilongo opo ve uye va kufe ombinga mokuninga omangeshefelo moikwamina,” Geingob ta ti.
Onghee okwa ti Namibia oshilongo sha manguluka okukala sha longela kumwe novanhu tava di kondje yoilongo okukala va xwaxwameka oshikondo shoikwamini needjo doushitwe. Okwa ti osha fimana opo Ovanamibia va longele kumwe mokukwatela po oikwamina needjo doushitwe noshoyo menenedu laAfrica.
“Moshilongo keshe omwa pumbwa oikwamina needjo doushitwe opo shi dule okuxuma komesho,” ta ti.
fhamalwa@nepc.com.na