OMUTHIYA – Ovalandifi vokapana momatala mOmuthiya otava ti ova taalela eshongo linene eshi vehe wete vali eembwa dokudipaa va ninge okapana.
Otava ti eembwa paife oda pumba moshitukulwa molwaashi paife momaumbo kamu na sha, naashi ohashi va fininike opo va ka lande eembwa komikunda dokomakule.
Anna Shekudja ha landifa okapana kombwa noikulya yOshiwambo okwa hokolola ta ti ombelela yombwa oi holike unene kovanhu.
“Ngeenge nda dipaa ombwa ohai ningi ashike efiku limwe. Ovanhu ohava kala alushe va ngudumana tava pula ombelela yombwa,” ta hokolola.
Okapambu kamwe kombelela yombwa oke na oN$20, ngeenge omunhu okwa landifa nawa oha dulu okumona mo oshimaliwa fiyo opo N$3 000.
Marta Immanuel naye ha landifa okapana kombwa okwa ti kape na ongeshefa iwa i dulife okulandifa okapana kombwa molwaashi oha longo oshimaliwa shihapu.
“Okapana kombwa oka etela nge omauwa mahapu, onda tunga mo eumbo lange nokufutila ounona vange ofikoka va mana koiputudilo yopombada,” ta ti.
Ongeshefa yokulandifa eembwa di na omwenyo otai ende nawa mOmuthiya nomomikunda dopomudingonoko molwaashi ovalandifi vokapana kombwa ohava lande nawa eembwa di na omwenyo nokonima tave di dipaa va ka landife okapana.
Ovakalimo vodoolopa yaMuthiya ova lombwela Kundana tava ti mOmuthiya ile omikunda dopopepi ihamu monika vali ombwa molwaashi eembwa oda tulwa komipini nokomakala.
Ova ti ovanhu paife ihava kolo vali eembwa oshali ngaashi kwa li nale, onghee ovanhu ohava tekula eembwa nelalakano lokulandifa.
Okambwa kopokati oke na oN$400 omanga ombwa yakula oi na oN$600.
Lonia Hangula ha landifa okapana kombelela yoshikombo nongobe okwa hokolola ta ti ngeenge efiku olo momatala omwa dipawa ombwa ihava mono ovalandi vahapu shaashi ovanhu aveshe ova hala okulya ombelela yakatali.