OMUTHIYA- Hamushangandjai woSwapo Sophia Shaningwa okwa ti okwa hafifwa koilonga noundjungu yovakainhu mongudu SwapoWC, eshi veshi pondola oku yahambula po evava lavo.
“Koitukulwa ya yooloka onda mona ko elunduluko liwa loomeme tava twikile nokulonga nelitulemo okukalekapo evava lavo loSwapo,” Shaningwa ta ti.
Edi Shaningwa okwe di popya pefimbo SwapoWC a patula pambelewa noku tula ekotamango moilonga kOmuthiya oshivike sha djako.
Okwa kumaida ovakainhu opo va fimaneke ekotamango leveva lavo noshoyo okukala ve na eudeko lawana, nokuyandje ehongo kovakainhu vakwao va kale navo ve uditeko ekotamhango longudu.
Shaningwa okwa ti ongudu yoSwapo otai twikile nokulonga noudinini opo i dule okuyambidida evava loSwapoWC.
“Evava lomeme loSwapo ota li kwafele oomeme va kale tava tukulilafana ouyelele kombinga yomahepeko oukashike kookanhu noshoyo okukaleka po oufike pamwe moshilongo hano 5050,” ta ti.
Onghee okwa kumaida oomeme opo va kale tava kundafana kombinga yomashongo a kuma oshilongo ngaashi okuhe na oilonga mokati kovanyasha, onghalo yenota komikunda, omahepeko taa ningilwa ounona noshoyo okukundafana kombinga yefimano lounamapya.
Okwa kumaida yoo vali oomeme opo va tekulile ounona vavo outeku wo shili, okufimaneka omifyuululwakalo opo vaha ninge oihakanwa yokulonga oimbuluma.
Moshipopiwa shaye, omukwatakanifi wongudu yoSwapo moshitukulwa shaShikoto, Armas Amukwiyu kwa ti oomeme nava kale tava popi novanyasha va kufeko oshihopaenenwa shokukalekapo ongudu yoSwapo ngaashi naana ve shipondola.
“Oomeme omwa longa oshilonga shipondolifa okukalekapo eveva leni loSwapo. Omwe tu ulikila oshihopaenenwa shiwa,” Amukwiyu ta ti.