Minista gwiipindi niikwafaabulika Lucia Iipumbu okwa holola euvonayi lye ngele tashi ya komashingithilo okuza moNamibia okuya koJapan, ngoka ga thikama ngashiingeyi poomiliona N$90.
Iipumbu okwa li a lombwele iikundaneki mEtiyali pEgumbo lyEpangelo kutya ope na ompumbwe yetsokumweuvathano pokati kaNamibia naJapan opo ku yambulwepo omalandithilo pokati kiilongo mbika iyali.
“Andola otwa li neuvathanotsokumwe lya kola, ngeno iilongo ayihe iyali otayi kala noondando tadhi uvathanwa pehulilo lyesiku.
Shika otashi tula pombanda omayalulo getu gomapingakanitho giipindi,” Minista Iipumbu ta ti ngaaka.
Okwa ti Namibia oha landa iilongomwa osho wo omayakulo kuJapan gongushu yobiliona N$1.4, ta ti: “Otwa pumbwa okulundulula omiyalu ndhika notwa pumbwa okutula po omauvathano ngoka taga shoneke unene kiikondo mbyoka kaatu li melongelokumwe nayo pethimbo ndika.”
Minista okwa li ta popi montaneho yominista yaJapan yeliko, iipindi niikwafaabulika, Nishimura Yasutoshi. Iipumbu opamwe naminista gwiikwamina noonkondo Tom Alweendo oya nikathana komilungu naNishimura opamwe nosheendo she shi na sha nomakwatathano pokati kiilongo mbika iyali miikondo yi na sha neliko, mwa kwatelwa wo oonzo dhopaushitwe noonkondo ndhoka hadhi ndulukwa okuza momeya.
Oya kwandjangele unene kombinga yeliko, iikwankondo, uuhaku nendulukepo lyomashina, osho wo oshikondo shiihauto.
Okwa ti oonkundathana ndhika otashi vulika dhi ka vale okakomisi komapingakanitho giipindi naJapan opo ku yambulwepo ekwatathano lyopaliko pokati kiilongo mbika iyali.
Yasutoshi okwa li a koleke nokushilipaleka kutya oye na ehalo okunkondopeka ekwatathano lyopaliko naNamibia.
Iiiongo mbika iyali oya li ya shaina omauvathanotsokumwe, mwa kwatelwa lyimwe pokati kehango lyepangelo lyiikwamina, Epangelo Mining noJapan Organisation for Metals and Energy Security opo ku yambulwepo oshikondo shoka shokufula oonzo dha pumba.
–Nampa