ONGWEDIVA – Ondungedilaadilo yokueta po omauliko opaipindi, taa ifanwa Ongwediva Outdoor Food Market oya twima ko. Hiskia Hiskia omuunganeki nomukwateli komesho woshiindingili eshi, okwa ti okwa tengenekwa omauliko otaa ka tameka okudja mo 27 Aguste fiyo 1 Sepetemba 2023 mOngwediva. Hiskia ta ti oshi li omukalondjikilile kutya momauliko opaipindi owina ohaa kala ashike okulandifa oikunwa unene oikolwifa, ashike osha pumba okuninga omauliko a tofa mo ashike oikulya, unene oyo hai landifwa momapandaanda. Hiskia okwa twikila kutya elalakano loshivilo eshi okuyandja omhito kwaavo ve na omangeshefelo opedu opo va dule yoo kukufa ombinga, voo va mone oimaliwa. “Ngeenge hatu popi ovanengeshafa vopedu otwa diladila ovalandifi voupana momalukanda, ovalandifi voihape noingumutulu noikulya ihapu ya wedwa po,” Hiskia ta ti. Otwa hala okuyandja omhito kovanangeshefa ava oule womafiku atano opo va dule okumona oshimaliwa sha kola moule womafiku oo.
Okwa weda po yoo kutya ovakufimbinga aveshe otava ka pewa omaano oshali.