Mbudi zovatjangi
Windhoek
Gumwe ogu gaveruka kouvera woTB, sivike kasipwire kakandwirepo nombudi dokutanta asi uvera ou kwakara tupu kovasovagani ntani kovantu woruhepo.
Karin Hasselman, mukadi ogu kakere posilika esi kumwe nokutantera vantu asi TB uvera wankenye gumwe. Age kauyungire posilika esi kavadene ezuva lyoTB mouzuni moKatutura, moVenduka, nokugava asi ngapi vamugwene mukisi ogu ntani age asi kapi gwakara asi goruvara musinke ndi asi ngapi omu oparuka.
Ame kuna sikama nayina komeho zeni, ngomuntu, zinya, mukada pasitora, muhakuli ntani muveli gwanare gouvera woTB, nokuzamo afaturure asi ngapi omu gaparuka nouvera ou woTB.
Age kapi gagazarere asi kuvhura kuvera uvera woTB, Husselman,age kapi gayitambwire usimbu asi yinke yina kuhoroka kapi gayigazarere asi nampo uvera ou una kumuheha.
Husselman, kwamugwene asi ana kara nomukisi ogu age mepwizumuko kumwe nekoro lyendi koCape Town kumwe nokumuporesako kekoro ntani kapi gatengwire nawo moNamibia konyara yivike yongandi ntani ana kuyavagwana. Age simpe kankondopekere mulyo gokukwama omu vana kupe asi ngapi noruganesa nomutji edi novhura kusikisamo moomu vana kudikupa. Age kahundilire vahakuli asi vahepa kugenderera mokugwana usimbu asi muntu ogu tavere uvera woTB. Posiruwo sooso, ministera goukanguki noukali nawa, Ndokotora Bernhard Haufiku, nage gumwe kakere asi muuyungi posilika oso, kumwe nokuzamo asi ngapi muntu omu novhura kudimburura asi ngesi TB zina kukuheha, ndi asi zina kukugwana ntani mulyo musinke gwakaramo mokugugwana ndi asi kuguhakura. Haufiku kahundilire vantu navenye asi vahepa kukara tavalitara vene moukanguki yipo gwahavagwana mukisi ogu goTB.
“Ose twadiva asi yinke ayiretesapo TB, twadiva omu natulipopera, ntani twadiva omu natugava uhaku wouvera woTB, yinke nye eyi tuna kumona asi uvera ou kuvhura utu funde? Upitisili kapisi kukara muna politika, mwelike wakara. Nampili kosure zontateko, monkarapamwe, koyirugana yoge nampili modorongo moomu.
Ose twahepa kugusa sinka esi sikare sanyamwetu ntani kupitisira tuhageke TB, yimo ana kutanta ngoso Haufiku. Age kavauyungisire pezuva eli lyouzuni ava dana ndi ava diworoka uvera ou, nokuvatantera asi mvhura ezi siturwapo musinke sina kara, “ kuna hara kupitisira uzuni una pili uvera woTB.
Age simpe katente asi kuna kara asi vantu kugwana mukisi ogu morwa kapi vakara nountungi una wapere, kapi vana kuparuka nawa, epiro yirugana, ntani kupira mavango gomawa gokulivaterera, kukona makanya ntani kunwa yikorwesa makuru nwininina. Ogu nage kakere posilika esi Dr. Mary Bantuo, ogu kauyungire kukwateramo mbunga ezi zakarerapo ukanguki mouzuni. Brantuo, katente asi mokukasika pontambo zokutanta asi kwato hena TB,ntudi twahepa kukara novampitisili vana kara asi awo kwakurugana novantu kutamekera konomukundagona.
Vampitisili vahepa kukara asi kuna kupitisira ntani vana lituramo unene mokurwanesa mukisi ogu goTB, yimo ngoso ana kutanta Brantuo. Age simpe kahundilire epangero lyaNamibia asi vahepa kugwederera yimaliva eyi vana kuyerekera yomukisi ogu goTB yipo asi vahakure uvera ou nokuukeverera. Age simpe kapandwire epangero eyi lyagwederera yimaliva eyi yoTB monmvhura murongo dakapita.
“Ngomu asi epangero kunalituramo unene sitambo asi vahagekese TB ndi asi magano ogo gahepa kuwapa, mokutara asi vantu vahanyanda hena komukii ogu, vahepa kuyikeverera eyi, nononkambadaro edi dina karapo. Vasiki vetu ngwendi Exit navamwe ngoso kavakere vanalihameseremo mokudiworoka ezuva eli, lyokutanta asi twahepa kuhageka mukisi ogu goTB, omu vana kugava mbudi ezi kupitira mokudimba vadiworoke ezuva eli pontambo zouzuni.