Presidente Nangolo Mbumba okwa pititha elombwelo pambelewa kutya ethimbo lyokuyunga oosa moshilongo ashihe, dhanakusa omupresidente Hage Geingob otali tameke momasiku 5 Febuluali sigo esiku lyefumbimbiko.
Etseyitho ndika olya li lya pitithwa mOsoondaha kuminista gwomauyelele nomakwatathano gopaungomba Dr Peya Mushelenga, ngoka a ti omapandela agehe goshilongo, naga tsilikwe etata uule wethimbo ndyoka, osho wo koombelewa adhihe dhuukalelipo shilongo waNamibia. Esiku lyefumviko inali tseyithwa natango.
Okwa li wo a tseyitha kutya presidente Mbumba okwa toto po okakomitiye hoka taka ungaunga nomalongekidho gefumviko, noka kwatelwa komeho komunashipundi Saara kuugongelwa-Amadhila.
Okakomitiye haka otaka ka tseyitha pambelewa esiku lyefumviko uuna omalongekidho agehe ga pu. Mushelenga okwa li wo a takele oshigwana omunwe opo kaashi taandaleke uuyelele wiifundja, sho shi tegelele uuyelele wopambelewa okuza kokakomitiye. Geingob, ngoka a li omupresidente omutitatu gwaNamibia, okwa hulitha mOsoondaha mOvenduka. Ohahende ya tseyika nawa, ngoka e li wo omupopiliko gwofamili yaGeingob, Sisa Namandje, okwa tseyitha kutya ohungi nomagalikano otaga ka ningwa esiku kehe poshigumbo shaGeingob.
Ta popitha aalilasa mOsoondaha poshigumbo, Namandje okwa ti inashi yela mo nawa natango nkene ohungi tayi ka kala oshoka epangelo inali tseyitha manga kombinga yomalongekidho gefumviko.
“Okwa kala aluhe hu uvu ombili uuna megumbo lye mu na aantu oyendji, aluhe omu na ongundu ompe yaantu megumbo lye,” Namandje ta gwedha po ngaaka. Ohungi nomagalikano otaga kala ko esiku kehe okuza potundi 18h00 sigo president ta fumvikwa.
Namandje okwa ti nakusapresidente okwa kala nokukumika etungo lyegumbo Namibia, onkene aalilasa ya yooloka, mwa kwatelwa yoongundu dhompilamena, oya tameke okugongala poshigumbo shapresidente ya gandje esimaneko lyawo lyahugunina.
“Ope na elunduluko lyetaambe ko dhomiya dhoshilongo omolwonkalo ndjika, ashike ku wete mo omainda gopolisi nenge getanga lyegameno momapandaanda oshoka kamu na oshiponga sha sha. Kehe gumwe ota yambidhidha ofamili,” Namandje ta ti ngaaka.
Geingob okwa hulithile moshipangelo mOvenduka koongulasha dhOsoondaha. Okwa li a galukile moNamibia mEtitatu sho a li a ka mona omayakulo guunamiti koAmerica.
-Nampa